JUDAS

1

Introdusaun      

                ¹ Judas, Jesus Kristu nia atan no Santiago nia alin, ba doben sira iha Aman Maromak, nebe bolu ona no rai hela iha Jesus Kristu: ² laran luak, dame no domin sai wa’in liu tan iha imi.

³ Doben sira, tamba laran manas tebes atu hakerek ba imi kona ba ita hotu nia maksoin, ha’u sinti atu hakerek duni hodi husu imi atu halo funu tamba fiar, nebe hato’o tiha ba santu sira dala ida ba nafatin; ⁴ basa ema aat balun tama sub-subar deit nebe houri uluk kedas iha ona destinu atu lakon; sira ne’e halo aat Maromak nia grasa atu ema moris arbiru deit hodi heli ita Na’i Jesus Kristu.

                ⁵ Ohin ha’u hakarak fo hatene fali ba imi, maski imi hatene ona buat hirak ne’e hotu, katak ita Na’i, wainhira Nia soi tiha ona povu housi Egiptu, ikus mai halo lakon sira hotu nebe la fiar. ⁶ Mos anju sira nebe lakon sira nia kmanek maibe husik sira nia kadunan, Maromak kaer sira ho korente ba nafatin iha nakukun laran, atu simu justisa iha loron boot. ⁷ Nune’e mos Sodoma no Gomorra no sidade besik sira; ema sira iha neba halo buat aat oi-oin hanesan anju aat sira no hafo’er an la tuir tan ema nia lisan; sira ne’e sai ona nudar esemplu susar boot ahi rohan laek nian. ⁸ Lohidor sira ne’e mos, hanesan sira, tan husik sira nia hakarak aat lori sira, hafo’er sira nia isin, hasara Na’i Maromak no insulta anju diak sira. ⁹ Arkanju Miguel, wainhira nia halo funu hasouru diabu atu manan Moises nia isin, la hateten liafuan aat ba nia, maibe nia dehan: “Maromak sei fo kastigu ba o!” ¹⁰ Maibe ema sira ne’e hateten aat buat hotu nebe sira la hatene; buat hotu nebe sira hatene housi isin, nudar balada nebe hanoin la iha, buat sira ne’e mak halo aat sira. ¹¹ Susar tebes ba sira! Sira la’o tuir Caim; tan osan, sira la’o tuir hanorin aat nebe Balaao halo. Sira halo funu nudar Core halo, no hanesan nia, sira lakon deit. ¹² Iha imi nia han-hemu hamutuk, sira halo festa, moe la iha, hodi hafo’er nia. Sira hanoin deit sira an rasik; hanesan kalohan nebe anin lori mai lori ba, nebe la lori udan; sira hanesan ai-hun nebe maski iha tempu atu fo fuan, ai-fuan la iha; mate dala rua, ema fokit tiha ona. ¹³ Sira hanesan laloran fuik iha tasi, no sira nia hahalok aat hanesan laloran nia furin; hanesan fitun nebe la’o mai la’o ba; ba sira mak Maromak rai hela fatin iha nakukun boot nia laran ba nafatin.

                ¹⁴ Enoc, Adao nia bei-oan ida, hateten nanis liafuan ida ne’e kona ba sira: “Na’i Maromak sei mai ho nia anju santu sira, rihun ba rihun, ¹⁵ atu lori justisa ba ema hotu; no atu tesi lia ba sira hotu ne’e tamba sira nia hahalok aat nebe sira halo no ba liafuan aat nebe sala na’in sira hateten aat ba Nia.”

                ¹⁶ Sira ne’e mura-mura no fo sala ba ema seluk nafatin; sira halo tuir deit sira nia hakarak aat; sira gaba an no hateten buat furak kona ba ema seluk atu sira bele manan buat ruma.

Lia menon no hanorin

                ¹⁷ Maibe, hanoin ba, belun sira, buat nebe Na’i Jesus Kristu nia apostolu sira hateten tiha ba imi. ¹⁸ Sira dehan, "Iha loron ikus, ema sira sei mosu mai nebe sei hasara imi; ema nebe halo tuir deit sira nia hakarak aat." ¹⁹ Sira ne’e sei halo ema haketak malu; sira ne’e halo tuir deit sira nia hakarak aat; sira ne’e la iha Espiritu iha sira laran. ²⁰ Imi fali, belun sira, haka’as an atu halo boot liu tan imi nia fiar. ²¹ Imi hamulak hodi Espiritu nia kbiit; hela nafatin iha Maromak nia domin hodi hein daudaun ita Na’i Jesus Kristu nia laran luak nebe sei haraik moris rohan laek ba imi. ²² Hanorin sira balun nebe namlele; ²³ tulun ema hodi hasai sira housi ahi; ba balun, hatudu laran diak hodi tauk; maibe hakribi sira nia hatais nebe fo’er ona ho sira nia hahalok aat.

Hamulak hahi nian

                ²⁴ Ba Nia nebe bele tulun atu imi la bele monu hodi halo imi sala laek no haksolok iha nia futar oin,  ²⁵ ba Maromak mesak deit, ita nia Maksoin, housi Jesus Kristu ita Na’i, gloria, kmanek, kbiit no naran boot houri uluk, ohin no tinan ba tinan! Amen.