3

Sardes

¹ ”Hakerek ba anju kreda iha Sardes nian hodi dehan, ‘Ne’e mak lia menon housi Ida be kaer Maromak nia espiritu na’in hitu no fitun hitu: Ha’u hatene o nia hahalok sira: ema hanoin katak o moris maibe lo-los o mate ona. ² Hader tiha ba; no hamoris fali buat uitoan nebe sei hela, nebe atu mate ona. Ha’u la hare los o nia hahalok sira iha Maromak futar oin. Hanoin ba buat nebe o simu tiha no rona. Kaer metin nia ba, hodi hakribi o nia sala. O la hader karik, Ha’u sei mai hanesan na’okten ida, hodi la fo hatene iha sa oras o sei hein Ha’u. ⁴ Maibe sei iha ema balun iha Sardes nebe la husik sira nia hatais sai foer, no sira ne’e sei la’o hamutuk ho Ha’u ho hatais mutin. Basa sira soi nia. ⁵ Ema nebe manan sei hatais nune’e ho unuk mutin; no Ha’u sei la kasu nia naran housi livru moris nian; maibe Ha’u sei sasin ba sira nia naran iha ha’u Aman no nia anju sira nia oin. ⁶ Se mak iha tilun, rona ba buat nebe Espiritu dehan ba kreda sira.’”

Filadelfia

⁷ ”Hakerek ba anju kreda Filadelfia nian: ‘Ne’e mak lia menon housi Ida be santu no laran los nebe kaer David nia siabe. Wainhira Nia loke, ema ida la bele taka, no wainhira Nia taka, ema ida la bele loke: ⁸ Ha’u hatene o nia hahalok sira. Ohin ha’u loke iha o nia oin odamatan ida nebe ema ida la bele taka, no Ha’u hatene katak maski o la dun maka’as, o halo tuir Ha’u nia liafuan no la nega Ha’u nia naran. ⁹ Ohin ha’u sei halo sira housi Satanas nia sinagoga sira, sira nebe hanaran an Judeu maibe bosok, basa sira la’os Judeu; Ha’u sei halo sira mai hodi monu iha o nia ain no halo sira simu katak o mak ida nebe Ha’u hadomi. ¹⁰ Tambao halo tuir Ha’u nia liafuan hodi tahan terus sira ho pasiensia, Ha’u sei bali o housi tempu babeur nian nebe sei mosu ba raiklaran tomak, atu koko povu hotu raiklaran ne’e nian. ¹¹ Ha’u sei mai lalais. Laran metin ba kona ba buat nebe o iha ona, atu ema la bele hadau o nia koroa. ¹² Ida nebe manan, Ha’u sei halo nia sai airim iha Ha’u nia Maromak nia santuariu; no nia sei hela iha neba ba nafatin; Ha’u sei hakerek iha nia Ha’u nia Maromak nia naran no sidade Ha’u nia Maromak nian nia naran, katak Jerusalem foun nebe tun mai housi Ha’u nia Maromak iha lalehan, no mos Ha’u nia naran foun rasik. ¹³ Se mak iha tilun, rona ba buat nebe Espiritu dehan ba kreda sira.’”

Laodiseia

                ¹⁴ ”Hakerek ba anju kreda Laodiseia nian, ‘Ne’e mak lia menon Amen nian, Ida be fo sasin ho laran metin, Maromak nia kriatura sira nia Hun lo-los. ¹⁵ Ha’u hatene o nia hahalok sira: o la manas no la malirin. Ha’u hakarak katak  o manas ka malirin, ¹⁶ maibe tamba o la manas ka la malirin maibe morna deit, Ha’u sei muta o housi Ha’u nia ibun. ¹⁷ O dehan, ‘Ha’u riku, ha’u halot tiha sasan barak no la kuran buat ida,’ hodi la hatene katak o kiak, kasihan liu, matan delek no isin tanan. ¹⁸ Ha’u dehan maka’as ba o, sosa housi Ha’u osan mean nebe koko tiha ona iha ahi laran atu o sai riku lo-los, no sosa mos unuk mutin hodi hatais no taka o nia isin tanan atu o la bele moe; sosa mos aimoruk ba o nia matan atu o bele hare. ¹⁹ Ida nebe Ha’u hadomi, Ha’u si’ak no disiplina.  Ne’e duni, hakribi teb-tebes o nia sala ba no laran badinas ba. ²⁰ Hare ba, Ha’u hamriik iha o nia odamatan oin hodi tuku. Imi ida karik rona Ha’u nia lia no loke odamatan, Ha’u sei tama hodi han hamutuk ho nia, no nia ho Ha’u. ²¹ Ida nebe manan, Ha’u halo nia tur hamutuk ho Ha’u iha Ha’u nia kadunan, nudar Ha’u mos manan no tur iha Ha’u Aman nia kadunan. ²² Se mak iha tilun, rona ba buat nebe Espiritu dehan ba kreda sira.’”