10

Livru housi anju

                ¹ Tuir mai, ha’u hare anju ida tan  nebe kbiit wa’in mai housi lalehan; kalohan taka nia ho arko-iris iha nia ulun, nia oin hanesan loron, nia ain hanesan airim ahi nian. ² Nia kaer livru kiik ida iha nia liman. Nia sama tasi ho nia ain kuana no sama rai ho nia ain karuk, ³ hodi hakilar ho lia maka’as, nudar leaun nebe lian. Wainhira nia hakilar, rai tarutu dala hitu. ⁴ No wainhira rai tarutu dala hitu ona, ha’u atu hakerek, maibe ha’u rona lia housi lalehan dehan, “Taka tiha buat nebe rai tarutu dala hitu dehan no keta hakerek nia.” ⁵ No anju nebe ha’u hare hamriik iha tasi no iha rai foti nia liman kuana ba lalehan ⁶ no jura hodi Ida nebe moris nafatin ba nafatin, nebe halo lalehan ho buat hotu nebe iha nia, rai tomak no buat hotu nebe iha nia, tasi no buat hotu nebe iha nia, atu la bele hein tan, ⁷ maibe atu iha loron nebe anju sei halia trombeta ba dala hitu, Maromak nia misteriu nebe Nia hato’o housi nia atan profeta sira halo tuir ona.

⁸ Tuir mai, lia housi lalehan nebe ha’u rona koalia dala ida tan, mai ha’u hodi dehan, “Ba, kaer livru nebe nakloke iha anju nebe hamriik iha tasi no rai nia liman.” ⁹ Ne’e duni, ha’u hakbesik anju hodi dehan ba nia atu fo livru kiik mai ha’u, no nia dehan mai ha’u, “Kaer no han ba; nia sei moruk iha o nia kabun, maibe midar hanesan baniben iha o nia ibun.” ¹⁰ Ha’u kaer livru kiik housi anju nia liman hodi han nia; midar hanesan baniben iha ha’u nia ibun; maibe wainhira ha’u han tiha nia, ha’u nia kabun moruk liu. ¹¹ No nia dehan mai ha’u, “O ten ke halo profesia dala ida tan kona ba povu no nasaun no lia no liurai barak.”