14

Bibi Oan nia maluk

¹ Tuir mai, ha’u hare iha ha’u nia visaun Foho Siao. Bibi Oan hamriik iha nia leten hamutuk ho ema rihun atus ida haat nulu resin haat; hakerek tiha iha sira hotu nia rentos Bibi Oan no nia Aman nia naran. ² Ha’u rona tarutu nebe mai housi lalehan hanesan tasi boot nia tarutu ka rai tarutu ida; hanesan knananuk housi ema sira nebe toka harpa. ³ Iha kadunan nia oin, sira hananu knananuk foun ida iha balada haat no katuas sira nia oin, knananuk ida nebe ema rihun atus ida haat nulu resin haat nebe hetan ona maksoin housi raiklaran deit mak bele hatene. ⁴ Sira ne’e mak sira nebe la lakon sira nia laran mos hodi la halo sala foer ho feto ruma; sira la’o tuir Bibi Oan ba fatin hotu nebe Nia ba; sira ne’e hetan maksoin iha ema sira leet atu sai ai-fuan uluk ba Maromak no ba Bibi Oan. ⁵ Sira la husik lia bosok ruma liu housi sira nia ibun basa la bele hetan sala iha sira.

Anju fo hatene loron tesi lia nian

                ⁶ Tuir mai, ha’u hare anju seluk tan, semu aas liu iha lalehan, atu haklaken evangeliu rohan laek ba ema hotu nebe horik iha rai, nasaun, rasa, lia no suku. ⁷ Nia hakilar ho lia maka’as: “Tauk Maromak ba hodi fo gloria ba Nia, basa tempu to’o ona ba Nia atu tesi lia; imi adora Ida nebe halo lalehan no rai no tasi no be matan hotu.”

                ⁸ Anju seluk tan tuir nia hodi hakilar: “Babilonia monu ona, Babilonia sidade boot monu tiha; nia nebe halo nasaun sira raiklaran tomak hemu tua nia laran foer nian.”

                ⁹ Anju ida tan tuir mai hodi hakilar ho lia maka’as: “Sira hotu nebe adora balada no nia estatua, ka simu nia sinal iha sira nia liman eh rentos ¹⁰ sei hemu tua Maromak nia laran nakali nian, nebe fui tiha ona la kahur ho be iha nia kopu hirus nian. Sira sei hetan kastigu iha ahi no fatuk iha anju santu sira no Bibi Oan nia oin ¹¹ no suar sira nia kastigu nian sei sa’e nafatin ba nafatin. Sira hotu nebe adora balada ka nia estatua ka simu sinal ho nia naran sei la hakmatek kalan eh loron.

¹² Tan ne’e sira nebe halo tuir Maromak nia ukunfuan sira no fiar Jesus Kristu ten ke sai laran metin.”

¹³ Tuir mai, ha’u rona lia ida housi lalehan dehan: “Hakerek ba: rahun diak ba sira nebe mate iha Na’i! Rahun diak duni, Espiritu dehan; basa sira bele hakmatek ona ba nafatin housi sira serbisu, basa sira nia hahalok diak la’o hamutuk ho sira.”

Gentiu sira ko’a hare no ku’u uvas

                ¹⁴ Iha ha’u nia visaun, ha’u hare kalohan mutin ida, no iha nia ema ida tur hela; hanesan Oan Mane ho koroa osan mean nian iha nia ulun no tudik ko’a hare nian iha nia liman. ¹⁵ Anju ida tan sai housi santuariu, no hakilar ho lia maka’as ba ida nebe tur hela iha kalohan: “Kaer o nia tudik ba hodi ko’a hare: tempu atu ko’a to’o ona, no hare raiklaran nian tasak ona. ¹⁶ Ne’e duni, ida nebe tur iha kalohan leten hahu ko’a hare iha rai, no rai nia fulin ko’a hotu ona.

                ¹⁷ Anju seluk tan sai housi templu iha lalehan; nia mos kaer tudik kroat ida. ¹⁸ Anju ida tan sai housi altar; nia mak ukun ahi. Nia hakilar ba ida nebe kaer tudik kroat: “Kaer o nia tudik ba hodi ku’u uvas sira hotu iha raiklaran; basa uvas sira tasak ona.” ¹⁹ Nune’e, anju hahu serbisu iha rai no ku’u iha to’os uvas sira hotu rai ne’e nian hodi hatama nia iha fatin boot atu sama uvas. ²⁰ Ne’e mak fatin Maromak nia laran nakali nian, iha sidade nia liur, iha nebe ema sama uvas ne’e to’o ran nebe sai housi fatin ne’e sa’e  aas to’o kuda nia tali hodi taka rai dook to’o liman rohan ba liman rohan nia sasukat rihun ida atus neen.