16

Anju sira lori kastigu oi-oin

                ¹ Tuir mai, ha’u rona lia ida housi santuariu nebe hakilar ba anju na’in hitu: “Ba, fakar bikan hitu Maromak nia laran nakali nian ba rai!”

                ² Anju uluk ba hodi fakar nia bikan iha rai. Kanek dois no aat mosu kedas iha sira hotu nebe simu sinal balada nian no adora nia estatua.

                ³ Anju seluk fakar nia bikan ba tasi, no tasi nakfila ba ran, hanesan ema mate nia ran, no buat nebe moris iha tasi laran mate hotu.

                ⁴ Anju seluk tan fakar nia bikan iha mota sira no be matan sira no sira hotu nakfila ba ran. ⁵ Hafoin, ha’u rona anju be nian dehan: “Ita Boot nebe Ohin no Uluk, los tebes wainhira Ita tesi lia. Ita Boot nebe santu.  ⁶ Basa ema fakar santu no profeta sira nia ran, no Ita Boot fo ran ba sira atu hemu; sira simu lo-los kastigu ne’e.” ⁷ No ha’u rona altar rasik dehan ho lia maka’as: “Tebes, Na’i Maromak kbiit wa’in, Ita Boot los duni wainhira Ita Boot tesi lia.”

                ⁸ Ba dala haat, anju ida tan fakar nia bikan ba loron no nia sunu ema sira hotu nia ahi; ⁹ maibe maski loron nia ahi han maka’as ema sira, sira ne’e hotar Maromak nia naran; Maromak nebe iha kbiit atu haruka atu mosu susar boot sira ne’e; sira la hakribi sira nia sala hodi hahi Nia.

                ¹⁰ Ba dala lima, anju ida tan fakar nia bikan ba balada nia kadunan no nia reinu tomak sai nakukun. Ema tata sira nia nanal tan moras, maibe sira la laran susar tan sira nia hahalok; ¹¹ sira hotar Maromak lalehan nian tan sira nia moras no sira nia kanek.

                ¹² Ba dala neen, anju ida tan fakar nia bikan ba mota boot Eufrates; mota tomak sai maran; nune’e loke dalan ba liurai sira housi lorosa’e atu tama mai. ¹³ Hafoin, ha’u hare espiritu foer na’in tolu sai housi samea boot nia ibun no housi balada nia ibun no profeta bosok nia ibun; espiritu foer sira ne’e hanesan manduku, ¹⁴ basa sira ne’e espiritu diabu nian nebe halo milagre; sira ba bolu liurai sira hotu rai ne’e nian atu halo funu iha loron boot Maromak kbiit wa’in nian. (¹⁵ “Ha’u sei mai hanesan na’okten. Rahun diak ba ema nebe hader hela no la hasai nia hatais atu nune’e nia la sai housi uma isin tanan hodi hetan moe boot.”) ¹⁶ Espiritu aat sira bolu liurai sira hamutuk iha fatin ida naran “Armagedon” iha lia ema Ebreu sira nian.

                ¹⁷ Anju ikus fakar nia bikan ba leten; lia ida hakilar housi templu: “Rohan to’o ona mai.” ¹⁸ Rai lakan no rai tarutu no rai nakdoko maka’as nebe ema la dauk koko buat ruma hanesan ne’e houri raiklaran hahu. ¹⁹ Sidade boot fahe ba sorin tolu no sidade tomak raiklaran nian monu hotu. Maromak la haluha Babilonia, sidade boot. Maromak halo nia hemu kopu nebe nakonu ho Nia laran nakali. ²⁰ Rai kiik sira hotu halai no foho sira tomak mohu lakon; ²¹ no be fatuk malirin sira, todan hanesan talenta ida, monu housi lalehan ba ema sira. Ema sira hotar Maromak tan Nia haruka susar boot be fatuk malirin nian; susar ne’e boot liu sira hotu.