19

Knananuk manan nian iha lalehan

                ¹ Ne’e hotu tiha, ha’u rona lia ida hanesan housi ema lubun boot iha lalehan; sira hananu maka’as, “Aleluia, maksoin, gloria no ukun ba ita nia Maromak! ² Nia los no diak wainhira Nia tesi lia; Nia tesi lia hasouru feto aat boot nebe halo aat raiklaran ho nia sala foer; Nia halo ona vingansa kona ba atan sira nebe feto aat ne’e oho tiha.” ³ Sira hananu maka’as dala ida tan, “Aleluia! Suar housi  feto ne’e nia sei sa’e nafatin ba nafatin.” ⁴ Tuir mai, katuas rua nulu resin haat no balada haat tuku tur ba rai hodi adora Maromak nebe tur iha kadunan; sira dehan, “Amen, aleluia.” ⁵ Hafoin housi kadunan, lia ida hakilar dehan: “Hahi ba ita nia Maromak, imi Na’i nia atan sira, no sira hotu, boot eh kiik nebe hamtauk Nia.” ⁶ Ha’u rona lia housi ema lubun boot hanesan tasi boot nia tarutu eh rai tarutu nian, hodi hatan, “Aleluia! Na’i, ita nia Maromak kbiit wa’in ukun dau-daun. ⁷ Ita haksolok ba no laran kmaan hodi fo gloria ba Maromak, basa ohin mak Bibi Oan nia festa kasamentu nian. ⁸ Nia noiva iha ne’e ona, nia hatais ho hena lahan furak, nabilan no santu,” basa hena lahan furak mak santu sira hotu nia hahalok diak.”

⁹ Anju dehan, “Hakerek ida ne’e: Rahun diak ba sira nebe simu konvite ba Bibi Oan nia festa kasamentu nian,” no nia dehan tan, “Sira ne’e mak lia menon los housi Maromak.” ¹⁰ Tuir mai, ha’u hakneak iha nia oin hodi adora nia, maibe nia dehan mai ha’u, “Keta halo nune’e: ha’u maluk atan ida deit hamutuk ho o no o nia maun alin sira nebe fo sasin kona ba Jesus. O sei adora Maromak.” Sasin nebe Jesus fo mak espiritu profesia nian.

                ¹¹ Hafoin ha’u hare lalehan nakloke, no kuda ida mosu mai; kuda na’in nebe sa’e nia nia naran mak Laran Metin no Los; ho justisa mak nia tesi lia no halo funu. ¹² Nia matan hanesan ahi lakan; nia ulun iha koroa ho fatuk murak sira; naran nebe hakerek iha nia, nia mesak deit mak hatene. nia hatais ho unuk nebe  hoban iha ran. ¹³ Ema hanaran nia “Maromak futar Lia” ¹⁴ Soldadu sira housi lalehan tuir nia. Sira hatais hena mutin nabilan no sa’e kuda mutin. ¹⁵ Housi nia ibun, surik kroat ida mosu atu oho gentiu sira; tan nia mak atu ukun sira ho oe besi nian, no atu halo tua Maromak kbiit wa’in nia laran nakali nian. ¹⁶ Iha nia manta no iha nia hitin, hakerek tiha naran ida: Liurai liurai sira nian no Na’i na’i sira nian.

                ¹⁷ Ha’u hare anju ida hamriik iha loron; ho lia maka’as, nia hakilar ba manu sira hotu nebe semu aas liu iha lalehan, “Mai iha ne’e. Mai halibur an hamutuk iha festa boot nebe Maromak halo dau-daun. ¹⁸ Imi sei han liurai sira nia naan, komandante sira no na’i ulun sira hotu nia naan, no mos kuda sira nia naan no sira nebe sa’e sira nia naan no ema oi-oin, atan no la atan, kiik eh boot nia naan.” ¹⁹ Tuir mai, ha’u hare balada boot, hamutuk ho liurai sira hotu raiklaran nian no sira nia soldadu sira, halibur hamutuk atu halo funu hasouru kuda na’in ho nia soldadu sira. ²⁰ Maibe sira ne’e kaer tiha balada hamutuk ho profeta bosok ida nebe halo milagre oi-oin tan balada nia hakarak, no housi milagre sira ne’e, lohi sira hotu nebe simu sinal balada nian hodi adora nia estatua. Ema soe sira na’in rua ne’e iha tasi nebe lakan ho ahi ensofre nian. ²¹ Sira seluk mate hotu tan kuda na’in nia surik, nebe sai housi nia ibun, no manu sira hotu han bosu ho sira nia naan.