20

Ukun tinan rihun ida nian

¹ Hafoin ha’u hare anju ida tun mai housi lalehan, nia kaer siabe matebian sira nia fatin nian iha nia liman no korente boot ida. ² Nia kaer samea boot, samea uluk nian nebe diabu no Satanas; nia kesi nia ho korente ba tinan rihun ida. ³ Anju soe nia ba matebian sira nia fatin, taka odamatan hodi tau kadeiadu, atu nune’e samea sei la lohi tan nasaun sira to’o tinan rihun ida liu tiha. Tinan rihun ida hotu tiha, samea bele sai, maibe ba tempu uitoan deit.

                ⁴ Hafoin ha’u hare kadunan sira no sira nebe simu kbiit atu tesi lia tur iha kadunan leten. Ha’u hare ema sira hotu nia klamar nebe ema tesi sira nia kakorok tan sira nia sasin kona ba Jesus no tan sira haklaken Maromak futar lia, no sira nebe lakohi adora balada ka nia estatua no lakohi simu nia sinal iha sira nia rentos eh liman. Sira moris hi’as fali hodi ukun hamutuk ho Kristu ba tinan rihun ida. ⁵ Ne’e mak moris hi’as uluk nian; matebian sira seluk seidauk moris hi’as to’o tinan rihun ida hotu tiha. ⁶ Haksolok no rahun diak ba sira nebe halo parte iha moris hi’as uluk nian; mate ba dala rua sei la kona tan sira maibe sira sei sai Maromak no Kristu nia am’lulik sira hodi ukun hamutuk ho Nia ba tinan rihun ida.

Funu ba dala rua

                ⁷ Wainhira tinan rihun ida liu tiha, Satanas bele sai housi dadur laran no sei sai atu lohi nasaun sira hotu iha lorosa’e no loromonu, tasi feto no tasi mane, ⁸ katak Gog no Magog; nia sei halo sira halo funu. Nia soldadu sira sei sai barak hanesan rai henek iha tasi ibun. ⁹ Sira sei mai hobur rai tomak hodi hale’u santu sira nia sidade, nebe Maromak hadomi. Maibe ahi tun mai housi lalehan hodi han sira hotu. ¹⁰ Tuir mai, diabu nebe lohi sira, sei monu iha tasi ahi no ensofre nian, iha nebe balada no profeta bosok hela, no sira nia susar sei la hotu, kalan loron, nafatin ba nafatin.

Gentiu sira nia kastigu

                ¹¹ Tuir mai, ha’u hare kadunan mutin boot ida no Ida nebe tur iha nia. Iha nia futar oin, rai no lalehan halai lakon no la hetan fatin ba sira. ¹² Ha’u hare matebian sira, boot eh kiik, hamriik iha kadunan nia oin; livru moris nian loke tiha no mos livru sira seluk; sira ne’e hatudu buat nebe sira halo wainhira sira sei moris iha rai; Maromak tesi lia ba matebian sira tuir hahalok sira ne’e.

                ¹³ Sira hotu nebe mate iha tasi laran mosu fali; ¹⁴ matebian sira housi Mate no matebian sira nia fatin sai housi neba; no Maromak tesi lia ba ema ida-ida  tuir nia moris. Mate no matebian sira nia fatin monu ba tasi nebe ahi han. Tasi nebe ahi han ne’e mak mate ba dala rua; ¹⁵ ema nebe nia naran la hetan iha livru moris nian sei monu iha tasi nebe ahi han.