21

Jerusalem lalehan

                ¹ Tuir mai ha’u hare lalehan foun no rai foun; lalehan uluk nian no rai uluk nian lakon mohu tiha, no tasi la iha ona. ² Ha’u hare sidade santa, Jerusalem foun, tun mai housi Maromak iha lalehan, furak hanesan noiva nebe hatais tiha ba nia laen. ³ Ha’u rona lia maka’as ida hakilar housi kadunan dehan, “O hare sidade ne’e? Ne’e mak Maromak nia horik fatin iha ema sira leet. Nia sei halo nia uma iha sira leet; sira sei sai nia povu no Nia sei hela ho sira no sai sira nia Maromak. ⁴ Nia sei hamaran sira nia mataben housi sira nia matan; mate la iha ona, no ema sei la tanis tan eh laran susar, basa sasan raiklaran uluk nian liu tiha ona.”

                ⁵ Tuir mai, Ida nebe tur iha kadunan dehan: “Ohin Ha’u halo foun buat tomak.” Nia  dehan tan, “Hakerek ida ne’e: katak buat nebe Ha’u dehan tebes duni no sei mosu mai.” ⁶ Nia dehan tan mai ha’u, “Buat ne’e hotu ona. Ha’u mak Alfa no Omega, hun no rohan. Ha’u sei fo be housi be matan moris nian be ema nebe hamrook, fo deit la fa’an. ⁷ Ida nebe manan sei simu liman rohan nee: no Ha’u sei sai nia Maromak no nia sei sai Ha’u oan. ⁸ Maibe ba taukten sira, ba sira nebe la halo tuir sira nia liafuan, ba sira nebe oho ema ka halo sala foer, ba sira nebe si’ik futuru, sira nebe adora lulik ka bosokten oi-oin; sira nia kolen mak mate ba dala rua iha tasi ahi ensofre nian.

Jerusalem foun

                ⁹ Anju sira na’in hitu ida nebe iha bikan hitu nakonu ho susar boot hitu ikus nian mai koalia ho ha’u dehan, “Mai iha ne’e, ha’u sei hatudu ba o noiva nebe Bibi Oan hola tiha.” ¹⁰ Iha espiritu, nia lori ha’u ba foho aas liu nia tutun; nia hatudu mai ha’u Jerusalem, sidade santa, tun mai housi Maromak housi lalehan. ¹¹ Maromak nia gloria nabilan tomak hale’u nia. Fatuk murak oi-oin hafutar nia. ¹² Nia lutu aas liu ho odamatan boot sanulu resin rua. Iha odamatan boot ida-ida, anju ida hamriik no uma-kain sanulu resin rua Israel ninian nia naran hakerek tiha iha odamatan sira nia leten. ¹³ Iha lorosa’e odamatan tolu, iha tasifeto odamatan tolu, iha tasimane odamatan tolu no iha loromonu odamatan tolu. ¹⁴ Sidade nia lutu ne’e hamriik iha fatuk boot sanulu resin rua nia leten. Apostolu sanulu resin rua Bibi Oan nian ida-ida nia naran hakerek iha fatuk sira ne’e.

                ¹⁵ Anju nebe koalia mai ha’u dau-daun lori fafulu osan mean nian ida atu sukat sidade, nia odamatan sira no nia lutu sira. ¹⁶ Sidade ne’e nia planu los liu; nia naruk hanesan nia luan. Nia sukat sidade ho nia fafulu. Sidade nia naruk konta housi liman rohan ida ba liman rohan seluk nia naruk rihun sanulu resin rua, nune’e mos nia luan no nia aas. ¹⁷ Nia sukat nia lutu hodi konta nia aas housi sikun to’o liman rohan atus ida haat nulu resin haat, anju usa sukat bai-bain. ¹⁸ Lutu ne’e halo ho fatuk jaspe nian, sidade tomak ho osan mean diak liu, hanesan vidru nabilan. ¹⁹ Lutu nia hun taka ho fatuk murak oi-oin: jaspe, safira, kalsedonia, esmeralda, ²⁰ sardonika, kornalina, krisolitu, berilu, topasiu, krisoprasu, jasintu, ametista. ²¹ Odamatan sanulu resin rua halo ho perola sanulu resin rua, no odamatan ida-ida mak perola boot ida deit. Sidade nia prasa osan mean diak liu, hanesan vidru mo-mos. ²² Ha’u la hare templu ruma iha sidade laran basa Na’i Maromak kbiit wa’in no Bibi Oan rasik mak templu, ²³ no sidade ne’e la presisa loron ka fulan atu leno nia, basa Maromak nia gloria leno nia no Bibi Oan mak nia ahi Oan. ²⁴ Nasaun gentiu sira nian sei la’o ho nia naroman no liurai raiklaran sira nian sei lori sira nia riku soi ba nia. ²⁵ Ema sei la taka nia odamatan iha loron; iha neba kalan la iha, ²⁶ no nasaun sira sei mai hodi lori mai sira nia rikusoi no sasan tomak. ²⁷ Buat foer ida la bele tama ba nia laran; ema nebe halo buat nebe foer eh bosok la bele, maibe sira deit nebe hakerek tiha iha Bibi Oan nia livru moris nian.