9

Ema moras isin mate hetan diak

                 ¹ Liu tiha ne’e, Nia sa’e ba ro, hakur tasi hodi ba iha ninia sidade. ² Sira mai hatudu ba Nia ema isin mate ida, latan hela iha hadak ida. Hare tiha sira nia fiar, Jesus dehan ba ema moras: “Oan, laran metin ba, o nia sala sira hetan ona perdua.” ³ Eskriba sira balun dehan iha sira nia laran: “Ema ne’e hateten aat Maromak” ⁴ Hatene tiha sira nia hanoin, Jesus dehan ba sira: Tansa imi hanoin aat iha imi nia laran? ⁵ Ida nebe mak la susar, dehan: ‘O nia sala sira hetan tiha perdua’, ka dehan ‘O hamriik, la’o ba’? ⁶ Diak, atu imi hatene katak iha rai Oan Mane iha kbiit atu kasu sala, Nia dehan ba ema isin mate; “O hamriik tiha, foti o nia hadak, la’o ba o nia uma. ⁷ Nia hamriik duni hodi la’o ba nia uma. ⁸ Hare tiha ne’e, ema lubun hakfodak ho tauk hodi hasa’e gloria ba Maromak nebe fo ba ema kbiit ida hanesan ne’e.

Jesus bolu Mateus

⁹ Sai tiha housi neba Jesus hare ema ida naran Mateus tur hela iha kobra impostu fatin. Jesus dehan ba nia: “O tuir Ha’u mai!” Nia Hamriik hodi tuir Jesus. ¹⁰ Tur tiha iha uma laran, ema publikanu no maksalak barak mai tur ho Nia, hamutuk ho nia eskolante sira. ¹¹ Hare tiha ne’e, fariseu dehan ba eskolante sira: “Nusa mak imi nia Mestre han hamutuk ho publikanu no maksalak sira? ¹² Rona tiha sira, Jesus dehan: “La’os sira nebe isin diak mak kuran doutor, maibe sira moras. ¹³ Imi buka hatene liafuan ne’e katak sa: ‘Ha’u hakarak laran luak liu fali sakrifisiu.’ Basa Ha’u mai la’os atu bolu ema diak sira, maibe ema maksalak sira.’

                ¹⁴ Liu tiha ne’e, Joao nia eskolante sira hakbesik ba Nia, dehan:  “Tansa mak ami ho fariseu sira hadera an, maibe o Nia eskolante sira lae?”  ¹⁵ Jesus hatan ba sira: “Laen nia belun sira bele laran susar wainhira laen sei hela ho sira? Loron sei to’o, wainhira ema sei hasai laen housi sira leet; iha loron ne’e mak sira sei hadera an.”

                ¹⁶ “Ema ida la bele taka hena tuan nia kuak ho hena foun, basa hena foun les hena tuan nia baluk, halo kuak sai boot liu. ¹⁷ Ema la tau tua foun iha kusi tuan; lae karik, kusi nakfera, tua nakfakar no kusi aat hotu. Tau tua foun iha kusi foun; nune’e buat rua ne’e ida la lakon.”

Feto moras ran suli sai.  Jairo nia oan feto.

¹⁸ Wainhira Jesus koalia dau-daun ba sira, sinagoga nia ulun ida hakbesik ba Nia hodi monu iha nia oin, dehan:  “Ha’u nia oan feto foin mate; maibe Ita boot hiit An mai tau liman ba nia, nia sei moris.”  ¹⁹ Jesus hamriik hodi la’o tuir nia hamutuk ho eskolante sira.

                ²⁰ Iha oras ne’e, feto ida nebe ran suli sai tinan sanulu resin rua ona, hakbesik ba Nia housi kotuk hodi kona nia tais ninin,  ²¹ basa nia dehan iha nia laran: “Ha’u kona karik ninia tais, ha’u sei hetan isin diak.” ²² Fila tiha ba kotuk, Jesus hare nia hodi dehan: “Ha’u oan, laran metin ba, o nia fiar soi ona o.” Iha oras ne’e kedas, feto ne’e hetan fali isin diak.

²³ Wainhira Nia to’o na’i ulun nia uma, hare tiha ema haklalak no barak seluk hakilar maka’as. Nia dehan; ²⁴ “Imi sai tiha. Labarik la mate; nia toba deit.” Sira hamnasa Nia. ²⁵ Wainhira ema lubun sai ona, Nia tama ba laran, kaer labarik feto nia liman, no labarik hamriik. ²⁶ Lia kona ba buat ne’e naklekar iha rai tomak neba.

Matan delek rua ho monok ida sai diak

²⁷ Jesus sai housi neba, ema matan delek na’in rua tuir Nia hodi hakilar, dehan: “David nia Oan, sadia ami.” ²⁸ To’o tiha uma, matan delek sira hakbesik ba Nia. Jesus dehan ba sira: “Imi fiar, katak Ha’u bele halo buat ne’e?” Sira hatan ba Nia: “Ami fiar, Na’i!” ²⁹ Nia kona sira nia matan, dehan: “Sai diak ba tuir imi fiar ba!” ³⁰ Sira nia matan nakloke. Jesus hateten ba sira ho lia maka’as; “Keta fo hatene buat ne’e ba ema ida.” ³¹ Maibe, sai tiha, sira halo Nia naran boot iha rai neba tomak.

                ³² Sira foin sai tiha, ema lori ba Nia ema monok ida ho diabu iha laran. ³³ Jesus duni sai diabu no ema monok ne’e koalia ona. Ema lubun hakfodak hodi dehan: “Ema ida seidauk hare buat  ruma hanesan ne’e iha Israel.”  ³⁴ Maibe fariseu sira dehan: “Hodi diabu sira nia ulun mak Nia duni sai diabu sira.”

To’os boot, maibe to’os atan uitoan

³⁵ Jesus la’o lemo sidade ho knua sira hodi hanorin iha sinagoga sira no haklaken liafoun diak reinu nian; fo mos isin diak ba ema moras sira no ba sira hotu nebe terus. ³⁶ Hare tiha ema lubun boot, Nia hanoin teb-tebes sira, basa sira kole no neon nakraik, hanesan bibi sira nebe bibi-atan la iha. ³⁷ Tan ne’e Nia dehan ba eskolante sira: “To’os boot duni, maibe to’os atan uitoan. ³⁸ Ne’e duni imi harohan ba to’os na’in atu haruka to’os atan sira ba nia to’os.”