11

Jesus hahi Joao Baptista

¹ Wainhira Jesus hanorin tiha nia eskolante na’in sanulu resin rua, Nia sai housi neba atu ba hanorin no haklaken iha sira nia sidade sira. ² Iha kadeia laran, Joao rona kona ba Jesus nia hahalok sira no nia haruka nia eskolante na’in rua atu husu ba Nia: ³ “Ita mak ida nebe atu mai, ka ami sei hein ema seluk?”  ⁴ Jesus hatan ba sira: “Imi haktuir ba Joao buat nebe imi hare no rona: ⁵ Matan delek sira hare; ain kudeik sira la’o; ema moras lepra sira sai mos; tilun diuk sira rona; mate sira moris fali; Liafoun Diak haklaken ba kiak sira: ⁶ no rahun diak ba ema nebe la lakon fiar iha Ha’u.”

                ⁷ Wainhira sira ba tiha ona, Jesus hahu koalia ba ema lubun kona ba Joao, dehan: “Imi ba hare sa ida iha rai fuik maran? Fafulu ruma nebe anin doko? ⁸ Imi ba hare sa ida? Ema ida hatais hena mesa furak? Maibe ema sira nebe hatais hena furak hela iha liurai nia kadunan. ⁹ Ne’e duni, imi ba hare sa ida? Profeta ida karik? Los duni, Ha’u dehan ba imi, liu fali profeta ida. ¹⁰ Kona ba nia mak hakerek tiha ona: ‘Ha’u haruka ha’u nia manu ain atu ba o nia oin hodi hadia dalan ba o.’  ¹¹ Ha’u dehan lialos ba imi: housi ema sira nebe moris housi feto la iha ida boot liu Joao Baptista; maibe ida nebe kiik liu iha reinu lalehan, boot liu nia. ¹² Houri Joao Baptista nia loron to’o ohin, ema hadau malu reinu lalehan; sira nebe haka’as an liu mak manan nia. ¹³ Basa ukunfuan no profeta sira si’ik to’o Joao. ¹⁴ Imi hakarak fiar karik, nia mak Elias nebe atu mai. ¹⁵ Ema nebe tilun iha atu rona, rona ba!”

Ema hakribi Joao no mos Jesus

¹⁶ “Ha’u sei tanesan ema derasaun ne’e nian ho se los? Sira hanesan labarik sira nebe tur iha prasa, koalia ba malu, ¹⁷ dehan: ‘Ami hakfuit ba imi, imi la bidu; ami hananu babenon, imi la tanis.’ ¹⁸ Joao Baptista mai, la han la hemu, sira dehan: ‘Nia diabu tama laran.’ ¹⁹ Oan Mane mai, han hemu, sira dehan: ‘Nia kaanten, lanuten, publikanu no maksalak sira belun!’ Maibe matenek hatudu an lo-los hodi ninia hahalok sira.”

Sidade aat sira sei hetan kastigu

²⁰ Ho ne’e, Nia hahu koalia hasouru sidade sira iha nebe Nia halo ona milagre barak liu, tan sira la halo penitensia. ²¹  “Susar ba o, Korozaim! Susar ba o, Betsaida! Basa milagre sira nebe halo ona iha imi leet, halo tiha karik iha Tiro no Sidon, kleur tiha ona mak sira hakribi sala hodi karon no ahi-kdesan. ²² Tan ne’e, Ha’u dehan ba imi katak iha loron justisa nian imi sei hetan todan liu fali Tiro no Sidon. ²³ O fali, Kafarnaum, hakarak foti an to’o lalehan? O sei monu to’o inferno! Basa milagre sira nebe halo ona iha o, halo tiha karik iha Sodoma, to’o ohin Sodoma sei hamriik hela. ²⁴ Tan ne’e, Ha’u dehan ba imi katak iha loron justisa nian o sei hetan todan liu Sodoma ninian.”

Jesus ho Aman

²⁵ Iha oras neba Jesus harohan, dehan: “Aman, lalehan no rai nia Na’i, Ha’u hahi Ita tan Ita subar tiha buat hirak ne’e ba matenek no neon na’in sira hodi hatudu ba kiik oan sira. ²⁶ Los duni, Aman, tan ida ne’e duni mak Ita hakarak. ²⁷ Ha’u Aman tau tiha buat hot-hotu iha ha’u liman; ema ida la hatene Oan, Aman deit mak hatene; nune’e mos ema ida la hatene Aman, Oan mak hatene, no mos ema nebe Oan hakarak hatudu ba nia.”

²⁸ “Mai besik Ha’u, imi hotu nebe kole no terus; Ha’u sei fo kmaan ba imi . ²⁹ Imi simu ha’u nia ukun ba hodi banati tuir Ha’u, tan Ha’u laran kmaus no haraik an; no imi sei hetan kmaan ba imi nia klamar. ³⁰ Basa ha’u nia ukun mamar, ha’u nia naha kmaan.”