1₃

Aiknanoik kona ba ema nebe kuda fini

¹ Iha loron hirak neba Jesus sai housi uma hodi tur iha tasi ibun. ² Ema barak teb-tebes mai hale’u Nia; tan ne’e Nia tur iha ro ida nia laran, ema lubun boot tur iha tasi ibun. ³ Nia hanorin buat barak ba sira ho aiknanoik, dehan: “To’os na’in ida ba kuda to’os. ⁴ Nia kuda dau-daun, fini balun monu iha dalan ninin, manu sira mai han. ⁵ Fini seluk monu iha fatuk laran iha nebe rai uitoan deit; sira ne’e moris  kedas basa rai la dun klean; ⁶ maibe loron sa’e, sunu tiha sira tan abut la iha, hafoin sira sai maran. ⁷ Fini seluk monu iha ai-tarak klaran; ai-tarak sira moris mai, hanehan sira to’o mate. ⁸ Fini seluk monu iha rai diak hodi fo fuan: balun dala atus ida, seluk neen nulu; seluk fali tolu nulu. ⁹ Ema nebe iha tilun, rona ba!”

                ¹⁰ Eskolante sira hakbesik ba Nia, dehan: “Tansa Ita koalia ba sira ho aiknanoik?  ¹¹ Nia hatan ba sira: “Ba imi fo hatene misteriu sira reinu lalehan nian, maibe ba sira lae. ¹² Basa ba ida nebe iha ona, sei fo tan atu nia iha liu tan; maibe ba ida nebe la iha, buat uitoan mos nebe nia iha sei hasai tan. ¹³ Tan ne’e mak Ha’u koalia ba sira ho aiknanoik, basa sira hateke dau-daun, maibe sira la hare; sira se tilun dau-daun maibe la rona, ka hatene los. ¹⁴ Nune’e sei sai duni tuir Profeta Isaias nia lia nebe dehan: ‘Imi rona ho tilun, maibe la hatene los; imi hare ho matan, maibe la hare mos. ¹⁵ Basa povu ne’e nia laran tos; sira nia tilun diuk no la bele rona; sira fuan la bele hatene los keta sira hakribi sira nia sala hafoin Ha'u halo sira fila ba diak.’ ¹⁶ Maibe rahun diak ba imi nia matan basa hare; no ba imi nia tilun basa rona. ¹⁷ Ha'u’dehan lialos ba imi katak profeta no ema diak barak hakarak teb-tebes hare buat nebe imi hare dau-daun, maibe la hare; no rona buat nebe imi rona, maibe la rona.”

                ¹⁸ “Ne’e duni imi rona di-diak aiknanoik kona ba ema nebe kuda to’os. ¹⁹ Fini nebe monu iha dalan ninin hanesan ema nebe rona liafuan reinu nian maibe la hatene lo-los. Ida nebe aat mai hodi hasai buat nebe kuda tiha iha nia laran, ²⁰ Fini nebe monu iha fatuk laran mak ida nebe rona liafuan hodi simu kedas ho ksolok. ²¹ Maibe tan abut la iha, nia mate lalais; hetan tiha susar eh terus tamba liafuan, nia monu kedas. ²² Fini nebe monu iha ai-tarak laran mak ida nebe rona liafuan maibe knaar sira no rikusoi mundu ne’e nian hanehan liafuan ne’e; halo nia la fo fuan. ²³ Fini nebe monu iha rai diak mak ida nebe rona liafuan hodi hanoin di-diak: ida ne’e fo fuan dala atus ida, ka neen nulu, ka tolu nulu.”

Aiknanoik du’ut aat nian

²⁴ Nia dehan tan aiknanoik ida ba sira: “Reinu lalehan nian hanesan ema ida nebe kuda fini diak iha nia to’os; ²⁵ maibe wainhira nia emar sira toba dau-daun, nia funu balun mai kuda du’ut aat iha trigu leet, hafoin nia ba tiha. ²⁶ Wainhira trigu sai boot tiha hodi fo fuan, du’ut aat mos mosu. ²⁷ To’os na’in nia atan sira mai buka nia hodi dehan ba nia: ‘Na’i, Ita la kuda fini diak iha ita nia to’os? Du’ut aat mai housi nebe?’ ²⁸ Nia hatan: ‘Ha’u nia funu balun ruma mak halo buat ne’e.’ Atan sira dehan ba nia: ‘Ita hakarak ami ba fokit tiha nia?’ ²⁹  ‘Lae,’ nia dehan, ‘keta halo be hodi fokit du’ut aat, imi fokit mos trigu. ³⁰  Imi husik sira rua moris hamutuk; loron ko’a hare nian to’o mai mak ha’u sei dehan ba to’os atan sira: ‘Imi hili uluk mak du’ut aat hodi futu hamutuk atu sunu; trigu fali, imi halot iha ha’u nia hoka.’”

Aiknanoik mustarda musan no fermentu nian

³¹ Jesus haktuir tan aiknanoik ida ba sira: “Reinu lalehan nian hanesan mustarda musan ida nebe ema kuda iha nia to’os. ³² Musan ne’e kiik liu ai musan sira hotu; maibe boot mai, nia moris boot liu hotu, to’o sai ai-hun nebe lalehan nia manu sira mai tur iha nia sanak sira.”

                ³³ Nia dehan tan aiknanoik seluk ba sira: “Reinu lalehan nian hanesan fermentu nebe feto ida kahur ho farina sasukat tolu, to’o nia sa’e di-diak.”

³⁴ Buat ne’e hotu Jesus dehan ba ema lubun boot ho aiknanoik sira; la ho aiknanoik, Nia la koalia ba sira. ³⁵ Nune’e sai tuir duni buat nebe uluk profeta dehan: “Ha’u sei loke ha’u ibun ho aiknanoik, Ha’u sei haklaken buat sira nebe susar houri mundu hahu.”

                ³⁶ Tuir mai, husik tiha ema lubun boot ne’e, Jesus ba fali uma. Nia eskolante hakbesik ba Nia hodi dehan: “Hanorin mai ami aiknanoik kona ba du’ut aat iha to’os.” ³⁷ Nia hatan ba sira: “Ida nebe kuda fini diak, ne’e Oan Mane. ³⁸ To’os mak mundu. Fini diak mak reinu nia oan sira. ³⁹ Funubalu nebe kuda fini aat mak diabu. Loron ko’a nian mak loron ikus mundu ne’e nian. Sira nebe ko’a mak anju sira. ⁴⁰ Ne’e duni, hanesan sira futu du’ut aat hodi sunu iha ahi, nune’e mos sei mosu  wainhira mundu sei to’o nia rohan. ⁴¹ Oan Mane sei haruka nia anju sira atu hasa’e tiha housi nia reinu sira hotu nebe fo esemplu aat no sira hotu nebe halo aat, ⁴² hodi soe sira ba ahi lakan iha neba sira sei tanis no ruun nehan. ⁴³ Ema diak sira sei nabilan hanesan loron iha sira Aman nia reinu. Ema nebe tilun iha, rona ba!”

Aiknanoik osan mean, fatuk murak no dai nian

⁴⁴ “Reinu lalehan nian hanesan murak ida nebe subar hela iha to’os laran, nebe ema ida hetan hodi haksumik fali. Ho ksolok boot nia fa’an buat hotu nebe nia iha hodi sosa to’os ne’e.”

                ⁴⁵ “Reinu lalehan nian hanesan kontratu na’in  ida nebe buka murak diak sira. ⁴⁶ Hetan tiha ida nebe folin boot, nia fa’an tiha buat hotu nebe nia iha hodi sosa murak ne’e.”

                ⁴⁷ “Reinu lalehan nian hanesan rede ida nebe ema soe ba tasi hodi dada ikan sira, kiik no boot. ⁴⁸ Nia nakonu ona, kail na’in sira dada ba tasi ibun; tur tiha, sira hili ikan diak sira tau hamutuk iha lafatik, sira nebe aat soe tiha. ⁴⁹ Sei sai nune’e mos wainhira mundu to’o nia rohan: anju sira sei mosu hodi haketak ema aat sira hodi ema diak sira. ⁵⁰ Hafoin sira sei soe ema aat sira ba ahi lakan manas: iha neba sira sei tanis no ruun nehan.”

                ⁵¹ “Imi rona los buat hirak ne’e hotu?” Sira hatan: “Ami rona.” ⁵² Nia dehan tan ba sira: “Tan ne’e, eskriba sira nebe matenek kona ba reinu lalehan nian hanesan aman ida nebe hasai buat foun no tuan housi nia rikusoi.”

Ema Nazare sira la simu Jesus

⁵³ Hanorin hotu tiha ho aiknanoik sira ne’e, Jesus husik rai neba. ⁵⁴ To’o tiha ninia rai, Nia hanorin iha sinagoga, halo ema hotu hakfodak hodi dehan: “Nia matenek ho nia kbiit hodi halo milagre hirak ne’e mai los housi nebe? ⁵⁵ Nia la’os badaen ai nia oan? Nia inan la naran Maria, no mos nia maun alin la naran Tiago, Jose, Simao ho Judas? ⁵⁶ Nia feton la hela hamutuk ho ita? Ne’e duni, buat hirak ne’e hotu, Nia hetan los housi nebe?” ⁵⁷ No sira lakohi simu Nia. Maibe Jesus dehan ba sira: “Ema hanai profeta ida iha fatin hotu; iha nia rai deit no iha nia uma mak ema hewai nia.” ⁵⁸ Nia la halo milagre barak iha neba, tan ema sira neba la fiar.