16

Sira husu sinal ida

                ¹ Ema fariseu no saduseu sira hakbesik ba Jesus atu koko Nia. Sira husu ba Nia atu hatudu ba sira sinal ida housi lalehan. ² Nia hatan ba sira: “Iha kalan imi dehan: ‘Tempu diak, basa lalehan mean.’ ³ Iha dader, imi dehan: ‘Ohin tempu la diak, basa lalehan mean nakukun.’ Imi hatene si’ik tempu hodi hare lalehan nia oin; maibe imi la hatene si’ik sinal tempu sira nian. ⁴ Derasaan aat ho laran foer ne’e husu sinal ida, maibe sei la sinal ida ba nia; sei fo deit sinal Jonas nian.” Tuir mai Nia husik sira hodi ba fatin seluk.

                ⁵ Wainhira eskolante sira hakur tasi ba sorin, sira haluha atu lori paun. ⁶ Jesus dehan ba sira: “Imi matan moris, neon na’in ho fariseu no saduseu sira nia fermentu.” ⁷ Sira hanoin hodi dehan ba malu: “Ne’e tan ita haluha lori paun.” ⁸ Maibe, Jesus hatene ne’e, dehan: “Imi ema fiar namlele, tansa imi haksesuk malu tan imi la lori paun? ⁹ Imi seidauk hatene lo-los? Imi kala haluha ona paun fuan lima nebe fo han ema rihun lima. Imi halibur resin sira iha luhu hira? ¹⁰ No mos paun fuan hitu nebe fo han ema rihun hat. Imi tau resin sira iha luhu hira? ¹¹ Nusa mak imi la hatene lo-los katak, wainhira Ha’u dehan ba imi ‘matan moris neon na’in ho fariseu no saduseu sira nia fermentu’, Ha’u la koalia kona ba paun?”

                ¹² Nune’e mak sira foin hatene katak Jesus husu atu sira souri an la’os hasouru fermentu paun nian, maibe hasouru fariseu no saduseu sira nia doutrina.

Pedro nia fiar

                ¹³ To’o tiha rai Sesareia Filipe nian, Jesus husu ba nia eskolante sira: “Ema sira dehan Oan Mane ne’e se los?”  ¹⁴ Sira hatan; “Balun dehan katak Nia mak Joao Baptista, seluk katak Elias, seluk fali katak Jeremias ka profeta ruma.” ¹⁵ Jesus dehan ba sira; “Imi fali dehan Ha’u se?” ¹⁶ Simao Pedro simu hodi dehan: “Ita Boot mak Kristu, Maromak moris nia Oan.” ¹⁷ Jesus hatan ba nia : “Rahun diak ba o, Simao, Jonas nia oan, basa la’os isin ka ran mak hanorin buat ne’e ba o, maibe ha’u nia Aman nebe iha lalehan. ¹⁸ Ha’u dehan fali ba o, ‘O Pedro, no iha fatuk ne’e nia leten Ha’u sei harii Ha’u nia kreda, nebe infernu nia kbiit sei la bele halo buat ida hasouru nia. ¹⁹ Ha’u sei fo siabe reinu lalehan nian ba o; buat hotu nebe o futu iha rai, sei futu iha lalehan; no buat hotu nebe o kore iha rai, sei kore mos iha lalehan.’” ²⁰ Hafoin Nia husu nia eskolante sira atu bele dehan ba ema ida katak Nia mak Kristu.

Fo sai ninia terus

                ²¹ Houri loron ne’e, Jesus hahu fo sai ba nia eskolante sira katak Nia sei ba Jerusalem atu hetan terus barak housi katuas no eskriba sira, no housi am’lulik boot sira; sira sei oho Nia, hafoin, liu loron tolu, Nia sei moris fali. ²² Pedro lori Nia ketak hodi hahu haksi’ak Nia, dehan: “Aat ne’e la bele kona Ita, Na’i!” ²³ Maibe, fila tiha ba Pedro, Jesus dehan: “Ba dook tiha, Satanas, o teri netik ha’u dalan; basa o la hanoin tuir Maromak nia hanoin, maibe tuir ema nian.”

Sei halo sa ida atu tuir Jesus

²⁴ Tuir mai Jesus dehan ba nia eskolante sira: “Ema ruma hakarak tuir Ha’u karik, nia sei hewai nia an rasik, sei lori nia krus hodi tuir Ha’u. ²⁵ Tan ema nebe hakarak soi nia moris, sei lakon moris ne’e; maibe ema nebe lakon nia moris tamba Ha’u, sei hetan fali nia. ²⁶ Ema ida manan los sa  wainhira nia manan mundu tomak, maibe ikus mai lakon nia klamar? Ka, ema bele fo los sa ida atu troka ho nia klamar? ²⁷ Basa Oan Mane sei mai iha nia Aman nia gloria, ho nia anju sira hodi selu ema hotu nia kolen, tuir ida-ida nia hahalok. ²⁸ Ha’u dehan lialos ba imi, ema balun iha ne’e sei la mate molok sira hare Oan Mane to’o mai ho nia reinu.”