18

Se mak boot liu

¹ Iha oras neba, eskolante sira hakbesik ba Jesus hodi husu ba Nia: “Se mak boot liu iha reinu lalehan?” ² Nia bolu labarik oan ida, tau nia iha sira klaran ³ hodi dehan ba sira: “Ha’u dehan lialos ba imi: imi la sai karik hanesan labarik oan sira, imi sei la tama iha reinu lalehan. ⁴ Ne’e duni, ema nebe haraik An hodi halo An hanesan kiik oan  ne’e, nia mak boot liu iha reinu lalehan. ⁵ Ema nebe simu kiik oan ida hanesan ne’e tan ha’u nia naran, nia simu ha’u. ⁶ Maibe ema nebe dada ba aat kiik oan sira ne’e ida nebe fiar ha’u, diak liu tara fatuk dulas batar nian iha nia kakorok hodi soe nia ba tasi laran. ⁷ Susar boot ba mundu tamba   aat sira! Hanorin aat sira ne’e sei iha duni, maibe susar boot tebes ba ema nebe hanorin aat!”

                ^8“ O nia liman ka ain dada karik o ba sala, tesi nia hodi soe tiha! O tama iha moris kudeik diak liu fali o monu ho liman rua ka ain rua ba ahi nebe la mohu. ⁹ O nia matan dada karik o ba sala, fokit nia hodi soe tiha! O tama ba moris ho matan ida deit, diak liu fali o monu ba infernu ho matan rua.”

                ^10“ Imi keta hewai kiik oan sira ne’e ida, basa Ha’u dehan ba imi katak sira nia Anju sira fihir nafatin ha’u Aman lalehan nia futar oin. ¹¹ Basa Oan Mane mai atu soi buat nebe lakon.”

Bibi nebe lakon

¹² “Imi hanoin oin sa? Ema ida iha karik bibi atus ida, sira ne’e ida lakon tiha, nia sei la husik sira na’in sanulu resin sia iha foho hodi buka ida nebe lakon? ¹³ Ha’u dehan lialos ba imi katak hetan tiha bibi ne’e, nia sei haksolok ho ida ne’e liu fali ho sira na’in sanulu resin sia nebe la lakon. ¹⁴ Nune’e imi nia Aman iha lalehan lakohi atu kiik oan sira ne’e ida lakon.”

Hanorin malu

^15“ O nia maun alin sala karik hasouru o, ba koalia ho nia mesa-mesak hodi hatudu nia sala. Nia rona o karik, o manan ona o nia maun alin ne’e. ¹⁶ Nia la rona o karik, ba lori tan ema ida ka rua atu lia hotu sai los hodi sasin rua ka tolu nia liafuan. ¹⁷ Nia lakohi rona karik ema sira ne’e, ba fo hatene ba Kreda. Maibe nia lakohi rona Kreda rasik, hare nia nudar ema gentiu no ema publikanu ida. ¹⁸ Ha’u dehan lialos ba imi: Buat hotu nebe imi futu iha rai sei futu metin iha lalehan; buat hotu nebe imi kore iha rai sei kore mos iha lalehan.”

Harohan hamutuk

^{19 ‘} Ha’u dehan tan ba imi: “Imi na’in rua lia tuir malu karik iha rai atu husu naran buat ida, Ha’u Aman nebe iha lalehan sei fo duni ba imi. ²⁰ Basa iha fatin nebe ema na’in rua ka tolu halibur hamutuk hodi Ha’u nia naran, Ha’u mos iha sira nia leet.”

Perdua dala hira

²¹ Tuir mai, Pedro hakbesik ba Nia hodi dehan: “Na’i, ha’u nia maun alin sira sala karik hasouru ha’u, ha’u sei perdua nia dala hira? To’o dala hitu?” ²² Jesus hatan: “Ha’u dehan ba o la’os dala hitu, maibe hitu nulu dala hitu.”

²³ “Tan ne’e, reinu lalehan nian hanesan liurai ida nebe hakarak sisi tusan ba nia atan sira. ²⁴ Wainhira nia hahu sisi, sira lori mai ema ida nebe iha tusan osan rihun sanulu. ²⁵ Tan nia la iha buat ida hodi selu, liurai haruka fa’an tiha nia ho nia feen, nia oan sira ho nia rikusoi sira hotu atu selu nia tusan. ²⁶ Atan ne’e monu ain ba nia hodi dehan: ‘Haraik loron ruma mai ha’u, ha’u sei selu hotu.’ ²⁷ Tan hanoin nia, atan ne’e nia Na’i husik nia ba hodi kasu nia tusan. ²⁸ Wainhira atan ne’e sai housi neba, nia hetan nia maluk ida nebe debe nia osan atus ida. Kaer tiha maluk ne’e, nia buti metin nia kakorok, dehan: ‘Selu o nia tusan ba!’ ²⁹ Nia maluk monu ain ba nia hodi harohan: ‘Haraik loron ruma mai ha’u, ha’u sei selu o!’ ³⁰ Maibe nia lakohi hodi haruka maluk ne’e ba dadur laran to’o nia selu nia tusan hotu. ³¹ Hare tiha buat ne’e, nia maluk sira ho neon susar ba haktuir ba Na’i. ³² Tuir mai, Na’i haruka bolu nia hodi dehan ba nia: ‘Atan aat, ha’u perdua o nia tusan tomak tan o harohan mai ha’u; ³³ Nusa mak o la hanoin o nia maluk hanesan ha’u hanoin o?” ³⁴ Hafoin, ho hirus, Na’i fo nia ba dadur na’in sira to’o selu nia tusan hotu. ³⁵ Imi ida-ida la perdua ho laran imi nia maun alin karik, Ha’u Aman iha lalehan sei halo mos nune’e ba imi.”