2₀

Aiknanoik serbisu na’in sira nian

¹ “Reinu lalehan nian hanesan to’os na’in ida nebe sai iha dader atu halo kontratu ho ema serbisu na’in sira ba nia to’os. ² Nia halo kontratu ho sira loron ida denariu ida hodi haruka sira ba nia to’os. ³ Tuku sia, nia sai fali hodi hare ema sira seluk iha luron la halo buat ida. ⁴ Nia dehan ba sira: ‘Imi mos ba ha’u nia to’os, ha’u sei selu imi nia kolen.’ ⁵ Sira ba. Nia sai fali iha loron fahe rua, no mos tuku tolu loraik hodi halo nune’e nafatin. ⁶ Tuku lima loraik, nia hetan tan ema seluk iha neba. ⁷ Nia husu ba sira: ‘Tan sa imi hamriik loron tomak iha ne’e la halo serbisu ruma?’ Sira hatan, ‘Ema la bolu ami.’ Nia dehan ba sira: ‘Imi mos ba ha’u nia to’os.’ ⁸ Iha loraik, to’os na’in dehan ba mandor: ‘Bolu serbisu na’in sira hodi selu sira nia kolen, hahu housi sira ikus to’o sira uluk.’ ⁹ Sira nebe mai tuku lima loraik hakbesik hodi simu ida-ida denariu ida. ¹⁰ Wainhira sira nebe uluk mai, sira hanoin atu simu liu maibe sira mos simu ida-ida denariu ida. ¹¹ Simu tiha osan, sira hamuun hasouru to’os na’in hodi dehan: ¹² ‘Sira nebe ikus ne’e serbisu oras ida deit, o selu sira hanesan ami, nebe terus kole ho manas loron tomak.’ ¹³ Nia hatan ba sira: ‘Ha’u belun, ha’u la hasouru ha’u lia ba o: ita la halo kontratu denariu ida ba loron ida? ¹⁴ Ne’e duni, simu buat nebe o nian hodi ba ona. Ha’u hakarak fo ida ikus ne’e hanesan ha’u fo ba o. ¹⁵ Ha’u la bele halo ho ha’u nia rikusoi nudar ha’u hakarak? Ka o laran moras tamba ha’u laran diak?”

                ¹⁶ Nune’e sira nebe ikus sei sai uluk, sira nebe uluk sei sai ikus.

Ba dala tolu Jesus fo sai kona ba nia terus

¹⁷ Sa’e dau-daun ba Jerusalem, Jesus bolu ketak sira na’in sanulu resin rua hodi dehan ba sira: ¹⁸ “Ita sa’e ba Jerusalem. Ema sei saran Oan Mane ba am’lulik boot no eskriba sira, nebe sei tesi lia atu Nia mate. ¹⁹ Hafoin sira sei saran Nia ba gentiu sira atu hamoe Nia, baku Nia hodi hedi Nia ba krus. Liu loron tolu, Nia sei moris hi’as.”

Zebedeu nia oan sira

                ²⁰ Tuir mai Zebedeu oan sira nia inan hakbesik Jesus hamutuk ho nia oan sira, monu iha nia ain hodi husu buat ida. ²¹ Jesus husu ba nia: “Ita hakarak sa ida?” Nia hatan: “Ita boot haruka atu atan nia oan mane rua ne’e ida tur iha ita sorin kuana, ida iha ita sorin karuk iha ita boot nia reinu.” ²² Jesus dehan: “Imi la hatene buat nebe imi husu ne’e. Imi bele hemu housi kalis nebe Ha’u atu hemu?” Sira hatan: “Ami bele.” ²³ Nia dehan fali ba sira: “Tebes duni, imi sei hemu housi ha’u nia kalis; maibe tur iha ha’u nia sorin kuana eh karuk, ne’e la’os Ha’u mak fo; ne’e ba sira nebe ha’u Aman hadia hela.”

                ²⁴ Rona tiha ne’e, sira na’in sanulu hirus maun alin rua ne’e. ²⁵ Jesus bolu sira hodi dehan ba sira: “Imi hatene katak na’i ulun gentiu sira nian ukun povu hodi kroat. ²⁶ Imi sei la halo hanesan ne’e; maibe iha imi leet se mak hakarak sai boot, nia sei sai imi nia atan; ²⁷ no ida nebe hakarak sai uluk, nia sei serbi sira seluk; ²⁸ Hanesan Oan Mane mai la’os atu ema serbi Nia, maibe atu serbi hodi saran nia moris atu soi ema barak.”

Ema Matan delek hare fali

²⁹ Wainhira Jesus sai housi Jeriko, ema lubun boot la’o tuir Nia. ³⁰ Iha oras neba ema matan delek rua tur hela iha dalan ninin. Rona tiha katak Jesus liu dau-daun, sira hakilar. “Na’i, David nia Oan, hanoin ami!” ³¹ Ema lubun boot si’ak sira hodi haruka sira nonok, maibe sira hakilar liu tan: “Na’i, David nia Oan, hanoin ami!” ³² Jesus hamriik, bolu sira hodi husu ba sira: “Imi hakarak Ha’u halo sa ida ba imi?” ³³ Sira dehan ba Nia: “Na’i, ami hakarak hare.” ³⁴ Jesus hanoin teb-tebes sira hodi kona sira nia matan. Sira matan diak kedas no ema sira ne’e tuir Nia.