₂₂

Aiknanoik festa kaben nian

¹ Jesus koalia fali ho aiknanoik hodi dehan ba sira: ²  “Ita bele tanesan reinu lalehan nian ba liurai ida nebe halo festa kaben ba nia oan mane. ³ Nia haruka atan sira atu ba bolu konvidadu sira ba festa, maibe sira lakohi mai. ⁴ Nia haruka tan atan sira seluk, dehan: ‘Imi dehan ba konvidadu sira: Aihan prontu tiha ona, ha’u nia karau ho balada sira oho tiha ona, buat hotu nahe tiha ona, imi mai kaben.’ ⁵ Maibe, hanesan lia la kona sira, ida ba tiha nia to’os, ida ba nia kontratu, ⁶ sira seluk kaer tiha atan sira, baku sira, oho tan sira. ⁷ Liurai laran nakali teb-tebes, haruka nia soldadu sira atu oho ema aat sira ne’e hodi sunu sira nia sidade. ⁸ Hafoin nia dehan ba atan sira: ‘Festa kaben prontu ona, maibe konvidadu sira la soi. ⁹ Ne’e duni, imi ba luron sira hodi konvida ba festa ema hotu nebe imi hetan.’ ¹⁰ Atan sira sai duni ba luron sira no halibur hamutuk ema hotu nebe sira hetan, diak no aat hodi halo festa fatin nakonu. ¹¹ Wainhira liurai tama atu hare konvidadu sira, nia hare ema ida nebe la hatais unuk festa nian, ¹² nia dehan ba ema ne’e: ‘Belun, tansa o tama iha ne’e la hatais festa nian?’ Ema ne’e nonok hela. ¹³ Tan ne’e, liurai dehan ba atan sira: ‘Imi kesi metin nia liman ho ain, soe nia ba nakukun iha liur, iha neba sei iha tanis no ruun nehan’ ¹⁴ Basa Na’i bolu barak, maibe hili uitoan deit.”

Kona ba impostu ba Cesar

                ¹⁵ Tuir mai, fariseu sira halibur an hamutuk hodi futu lia oin sa sira bele kaer Nia iha liafuan ruma. ¹⁶ Sira haruka sira nia eskolante sira hamutuk ho herodianu sira atu dehan ba Nia: “Mestre, ami hatene katak Ita koalia lialos, Ita hanorin Maromak nia dalan tuir lialos, la tauk ema ida, basa Ita la fihir ema. ¹⁷ Ne’e duni, dehan mai ami Ita hanoin oin sa: bele selu impostu ba Cesar ka lae?” ¹⁸ Tan hatene sira nia laran aat, Jesus hatan: “Laran makerek sira, tansa imi babeur Ha’u? ¹⁹ Imi hatudu osan impostu nian mai” Sira hatudu denariu ida ba Nia. Nia husu: ²⁰ “Se nia ilas mak ne’e, ho buat hakerek ne’e?” ²¹ Sira hatan: “Cesar nian” Ho ne’e, Jesus dehan ba sira: “Ne’e duni, imi fo ba Cesar buat nebe Cesar nian, no ba Maromak buat nebe Maromak nian.”

                ²² Rona tiha ne’e, sira hakfodak; hafoin sira la’o tiha hodi husik Nia mesak.

Kona ba moris hi’as

                ²³ Iha loron ne’e mos, saduseu sira nebe la fiar moris hi’as, ba buka Nia hodi husu ba Nia: ²⁴ “Mestre, Moises hanorin katak: ‘Mane ruma mate karik oan la iha, nia alin sei kaben ho feto faluk ida ne’e atu fo oan ba nia maun.’ ²⁵ Iha ami leet iha maun alin na’in hitu. Ida uluk kaben tiha, mate la husik oan hodi husik deit feto ba nia alin. ²⁶ Ida tuir mai mos hanesan; ida seluk mos hanesan, nune’e hotu to’o ida hitu. ²⁷ Ikus liu hotu, feto ne’e mos mate. ²⁸ Iha loron moris hi’as nian, sira na’in hitu ne’e  ida nebe los mak feto nia laen, basa sira hotu hola nia?” ²⁹ Jesus hatan ba sira: “Imi hanoin sala, basa imi la hatene Eskritura no Maromak nia kbiit. ³⁰ Basa iha loron moris hi’as nian  mane no feto sira sei la hola malu tan, maibe sira sei sai hanesan  anju sira iha lalehan. ³¹ Kona ba moris hi’as housi mate, imi la lee buat nebe Maromak dehan ba imi: ³² ‘Ha’u mak Abraao nia Maromak, Isaac nia Maromak, no Jacob nia Maromak.’ Nia la’os ema mate sira nia Maromak, maibe ema moris sira nia Maromak!

                ³³ Rona tiha Nia, ema lubun boot hakfodak ho nia doutrina.

Ukunfuan nebe boot liu

                ³⁴ Wainhira fariseu sira rona katak Jesus halo saduseu sira sai nonok, sira halibur an hamutuk. ³⁵ Sira ida, doutor ukunfuan nian, husu hodi koko Nia: ³⁶ “Mestre, ukunfuan ida nebe mak boot liu?” ³⁷ Jesus hatan ba nia: “O sei hadomi Na’i, o nia Maromak ho neon ho laran, ho o nia klamar tomak. ³⁸ Ida ne’e mak ukunfuan uluk no boot liu hotu. ³⁹ Ida tuir mai, atu hanesan nia mak: ‘O sei hadomi ema seluk hanesan o nia an rasik.’ ⁴⁰ Ukunfuan rua ne’e, ukunfuan sira hotu no profeta sira nia hun.”

Messias, David nia Oan

⁴¹ Wainhira fariseu sira halibur an hamutuk, Jesus husu ba sira: ⁴² “Imi hanoin sa ida kona ba Kristu? Nia se nia Oan?” Sira hatan ba Nia: “David nia oan.” ⁴³ Nia dehan ba sira: “Nune’e karik, tansa mak David, tuir Espiritu nia hanorin, hanaran Nia Na’i hodi dehan; ^{44 ‘} Na’i dehan ba ha’u nia Na’i: O tur iha ha’u nia sorin kuana to’o loron Ha’u tau o nia funu balun sira iha o nia ain okos?’ ⁴⁵ David hanaran nia karik Na’i, nusa mak nia mos nia oan?” ⁴⁶ Ema ida la hatene atu hatan oin sa ba Nia; no hahu housi loron ne’e, ema ida la berani atu husu tan Nia.