25

Aiknanoik fetoran sanulu nian

¹ “Reinu lalehan nian sei hanesan fetoran sanulu nebe kaer tiha nia ahi-oan hodi ba hasouru noivu. ² Sira na’in lima beik, na’in lima seluk matenek. ³ Sira nebe beik lori sira nia ahi-oan, maibe la lori mina; ⁴ sira nebe matenek lori mos mina iha botil, hamutuk ho sira nia ahi-oan. ⁵ Tan noivu, la mai lalais, sira matan dukur to’o sira toba ona. ⁶ Kalan fahe rua, ema hakilar. ‘Noivu mai ona, imi ba hasouru nia!’ ⁷ Fetoran sira hotu hader hodi hadia sira nia ahi-oan. ⁸ Fetoran beik sira dehan ba matenek sira; ‘Fo imi nia mina uitoan mai ami, basa ami nia ahi-oan atu mate dau-daun.’ ⁹ Maibe matenek sira hatan; “Keta la to’o ba ami no ba imi, diak liu imi ba sira nebe fa’an hodi sosa ba imi nia an rasik.’ ¹⁰ Maibe wainhira sira sosa, noivu to’o mai. Sira nebe prontu ona, tama hamutuk ho nia ba festa kaben nian, hafoin odamatan taka tiha. ¹¹ La kleur, fetoran sira seluk to’o mai, dehan: ‘Na’i, Na’i, loke odamatan mai ami!’ ¹² Maibe nia hatan: ‘Ha’u dehan lialos ba imi katak ha’u la hatene imi.’ ¹³ Ne’e duni, imi matan moris neon na’in, basa imi la hatene loron ka oras.”

Aiknanoik osan talenta sira nian

¹⁴ “Sei hanesan mos ema ida nebe, molok atu ba rai seluk, bolu nia atan sira hodi husik ba sira nia rikusoi. ¹⁵ Ba ida nia fo osan talenta lima, ba ida seluk nia fo rua, ba ida seluk tan nia fo ida; ba ida-ida tuir nia kbiit. Hafoin nia la’o tiha. ¹⁶ Ida nebe simu talenta lima ne’e, halo kontratu ho sira hodi manan tan lima. ¹⁷ Nune’e mos, ida nebe simu rua, manan tan rua, ¹⁸ maibe, ida nebe simu deit ida, ba ke’e rai kuak hodi hakoi subar nia na’i nia osan. ¹⁹ Kleur tiha, atan sira ne’e nia na’in fila mai hodi husu sira kona ba nia osan. ²⁰ Ida nebe simu talenta lima hakbesik hodi fo fali lima tan ba nia, dehan: ‘Na’i, ita fo talenta lima mai ha’u, talenta lima tan nebe ha’u manan mak ne’e.’ ²¹ Na’i dehan ba nia: ‘Diak los, atan diak no laran los; tan o hatudu laran los iha buat nebe kiik, ha’u sei fo buat barak ba o atu tau matan. Tama ba o Na’i nia ksolok.’ ²² Tuir mai ida nebe simu talenta rua hakbesik, dehan: ‘Na’i, ita fo mai ha’u talenta rua; rua seluk nebe ha’u manan mak ne’e.’ ²³ Na’i hatan ba nia: ‘Diak los, atan diak no laran los; tan o hatudu laran los iha buat nebe kiik, ha’u sei fo ba o buat barak atu tau matan . Tama ba o Na’i nia ksolok. ²⁴ Ikus liu ida nebe simu talenta ida deit mosu mai, dehan: ‘Ha’u hatene ita boot ema maka’as nebe ku’u iha nebe ita la kuda, halibur iha nebe ita la lekar. ²⁵ Tan ne’e ho tauk ha’u ba subar iha ita nia osan iha rai; buat nebe ita nian mak ne’e.’ ²⁶ Na’i hatan ba nia: ‘Atan aat no barukten! O hatene katak ha’u ku’u iha  nebe ha’u la kuda, ha’u halibur iha nebe ha’u la lekar. ²⁷ Ne’e duni, tuir lo-los o sei lori ha’u nia osan ba banku; nune’e, fila tiha mai, ha’u bele foti ha’u nia osan ho funan. ²⁸ Ne’e duni, imi hasa’e tiha talenta housi nia hodi fo ba ida nebe iha sanulu. ²⁹ Basa ba ida nebe iha ona sei fo tan hodi hetan barak liu; maibe ba ida nebe la iha, uitoan nebe nia iha sei hasai tan housi nia. ³⁰ Kona ba atan folin laek ne’e, imi soe tiha nia ba nakukun iha liur, iha neba nia sei tanis no ruun nehan.’”

Justisa iha loron ikus

³¹ “Wainhira Oan Mane mai iha nia gloria ho nia  anju sira hotu, Nia sei tur iha nia kadunan gloria nian. ³² Povu hotu sei halibur an iha nia oin. Nia sei haketak ema sira hanesan bibi atan haketak bibi malae housi bibi Timor. ³³ Nia sei tau nia bibi malae iha nia sorin kuana, bibi Timor iha nia sorin karuk. ³⁴ Tuir mai, liurai sei dehan ba sira nebe iha nia sorin kuana: ‘Mai, imi nebe Ha’u Aman fo bensa, mai simu nudar liman rohan reinu nebe hadia hela ba imi houri mundu hahu. ³⁵ Basa Ha’u hamlaha, imi fo han Ha’u; Ha’u hamrook, imi fo hemu Ha’u; Ha’u la’o rai, imi simu Ha’u; ³⁶ Ha’u isin tanan, imi fo hatais Ha’u; Ha’u moras, imi ba hare Ha’u; Ha’u iha dadur laran, imi ba hare Ha’u.’ ³⁷ Iha oras ne’e ema diak sira sei hatan ba Nia: ‘Na’i, wainhira los mak ami hare Ita Boot hamlaha, ami fo han; hamrook, ami fo hemu? ³⁸ Wainhira los mak ami hare Ita Boot la’o rai, ami simu; eh ho isin tanan, ami fo hatais? ³⁹ Wainhira los mak ami hare Ita moras eh iha dadur laran, ami ba hare ?’ ⁴⁰ Liurai sei hatan ba sira: ‘Ha’u dehan lialos ba imi: wainhira imi halo buat ne’e ba ha’u nia alin kiik sira ne’e ida, imi halo mai Ha’u rasik.’”

                ⁴¹ “Tuir mai, Nia sei dehan ba sira iha nia sorin karuk: ‘Imi hadook an housi Ha’u ho malisan ba ahi rohan laek nebe hadia hela ba diabu ho nia anju sira. ⁴² Basa Ha’u hamlaha, imi la fo han Ha’u; Ha’u hamrook, imi la fo hemu Ha’u; ⁴³ Ha’u la’o rai, imi la simu Ha’u; Ha’u isin tanan, imi la fo hatais Ha’u; Ha’u moras, Ha’u iha dadur laran, imi la ba hare Ha’u.’ ⁴⁴ Sira mos sei husu: ‘Wainhira mak ami hare Ita Boot hamlaha ka hamrook, la’o rai ka isin tanan, moras ka iha dadur laran, ami la tulun?’ ⁴⁵ Iha oras ne’e, Nia sei hatan ba sira: ‘Ha’u dehan lialos ba imi: wainhira imi la halo buat ne’e ba kiik oan liu sira ne’e ida, imi la halo mai Ha’u.’ ⁴⁶ Sira ne’e sei ba hetan terus rohan laek, sira nebe diak sei ba hetan moris rohan laek.”