26

Judeu sira futu lia

¹ Koalia hotu tiha, Jesus dehan ba nia eskolante sira: ² “Nudar imi hatene, loron rua tan Paskua ona; ema sei saran Oan Mane atu hedi Nia ba krus.”

                ³ Na’i ulun am’lulik sira nian ho katuas sira povu nian halibur an iha am’lulik boot naran Kaifas nia kadunan, ⁴ hodi futu lia atu kaer Nia sub-subar, hafoin oho Nia. ⁵ Maibe sira dehan: “Ita keta halo buat ne’e iha loron festa, atu povu la bele rungu-ranga.”

Mina morin iha Betania

⁶ Wainhira Jesus iha Betania, iha Simao nebe moras lepra nia uma, ⁷ feto ida nebe lori botil ho mina morin folin boot hakbesik ba Na’i hodi fakar ba nia ulun wainhira Nia sei tur iha mesa. ⁸ Hare tiha ne’e, eskolante sira hirus, dehan: “Tansa soe deit buat ne’e? ⁹ Basa mina morin ne’e bele fa’an ho folin boot no bele fo osan ne’e ba ema kiak sira. ¹⁰ Maibe hatene tiha buat ne’e, Jesus dehan ba sira “Tansa imi hasusar feto ne’e? Nia halo buat diak mai Ha’u. ¹¹ Basa kiak sira imi hetan nafatin iha imi leet, maibe imi sei la hetan Ha’u nafatin ho imi. ¹² Nia fakar mina morin ne’e ba ha’u nia isin hodi hadia ona Ha’u ba rate. ¹³ Ha’u dehan lialos ba imi: iha fatin hotu iha mundu tomak nebe sei haklaken liafoun diak ne’e, ema sei haktuir nafatin buat nebe nia foin halo hodi hanoin nia.”

Judas hasouru Jesus

¹⁴ Tuir mai, sira na’in sanulu resin rua ne’e ida naran Judas Iscariotes, ba buka am’lulik ulun sira ¹⁵ hodi dehan ba sira: “Ha’u saran karik Nia ba imi liman, imi sei fo hira mai ha’u?” Sira selu ba nia osan mutin tolu nulu. ¹⁶ Houri oras ne’e, nia buka tempu diak ida atu saran Jesus.

Han kalan ba dala ikus

¹⁷ Iha loron uluk festa Paun fermentu laek nian, nia eskolante sira ba husu Jesus; “Ita hakarak ami ba hadia sasan atu han Paskua iha los nebe?” ¹⁸ Nia hatan: “Imi ba hasouru ema ida iha sidade hodi dehan ba nia: ‘Mestre dehan: ‘Ha’u nia tempu to’o tiha ona; Ha’u hakarak halo festa hamutuk ho ha’u nia eskolante sira iha o nia uma.’” ¹⁹ Eskolante sira halo tuir buat nebe Jesus haruka hodi hadia sasan ba Paskua. ²⁰ To’o ona loraik Nia tur iha mesa hamutuk ho sira na’in sanulu resin rua. ²¹ Wainhira sira han dau-daun, Nia dehan: “Tebes Ha’u dehan ba imi; imi ida sei saran Ha’u.” ²² Ho neon nakraik teb-tebes, sira ida-ida hahu husu ba nia: “Keta ha’u karik, Na’i?” ²³ Nia hatan: “Ida nebe hatama nia liman hamutuk ho Ha’u iha bikan, nia mak sei saran Ha’u. ²⁴ Oan Mane tuir nia dalan nudar hakerek nanis ona kona ba Nia; maibe susar boot ba ema nebe saran Oan Mane ba mate: nia la moris karik kala diak liu!” ²⁵ Judas, ida nebe saran Nia, husu; “Keta ha’u karik, Mestre?” Jesus hatan ba nia: “O rasik mak dehan.”

Eukaristia ba dala uluk

²⁶ Wainhira sira han dau-daun, Jesus kaer paun, haraik bensa, silu hodi fahe ba nia eskolante sira, dehan: “Simu ba hodi han: ne’e Ha’u nia isin.” ²⁷ Hafoin nia kaer kalis, fo agradese hodi fo ba sira, dehan: “Imi hotu hemu ba: ²⁸ ne’e ha’u nia ran, ran moruk foun nian nebe sei nakfakar atu kasu ema barak nia sala. ²⁹ Ha’u dehan ba imi katak Ha’u sei la hemu tan tua uvas to’o loron nebe Ha’u sei hemu fali nia hamutuk ho imi iha ha’u Aman nia reinu.”

Pedro sei heli lia

³⁰ Hananu tiha knananuk ida, sira sai hodi ba Foho Ai Oliveira nian. ³¹ Jesus dehan ba sira: “Kalan ne’e imi nia fiar iha Ha’u sei namlele, basa hakerek nanis ona; ‘Ha’u sei hakanek bibi atan, bibi sira sei namkari.’ ³² Maibe moris hi’as tiha housi mate, Ha’u sei ba Galileia uluk liu imi.” ³³ Pedro hatan ba Nia: “Maski ema hotu husik Ita Boot, ha’u lae!” ³⁴ Jesus dehan ba nia: “Ha’u dehan lialos ba o: iha kalan ne’e kedas, molok manu kokorek, o sei nega Ha’u dala tolu.” ³⁵ Pedro simu fali: “Ha’u bele mate ho Ita Boot, maibe ha’u sei la nega Ita.” Eskolante sira hotu mos dehan nune’e.

Orasaun iha to’os

³⁶ Liu tiha ne’e, Jesus ba ho sira iha to’os ida naran Getsemane. Nia dehan ba eskolante sira: “Imi hela lai iha ne’e. Ha’u sei ba iha neba halo orasaun. ³⁷ Nia lori Pedro ho Zebedeu nia oan rua. La kleur. Nia hahu oin nakraik, neon susar. ³⁸ Nia dehan ba sira: “Ha’u laran susar to’o mate; imi hela iha ne’e hodi hader ho Ha’u.” ³⁹ La’o uitoan ba oin, Nia monu taka oin ba rai hodi harohan: “Ha’u Aman, bele karik, hadook tiha kalis ne’e housi Ha’u; maibe halo tuir Ita hakarak ba, la’os ha’u nian.”

                ⁴⁰ Fila tiha ba eskolante sira, Nia hetan sira toba hela. Nia dehan ba Pedro: “Imi la bele hader netik ho Ha’u oras ida deit? ⁴¹ Imi matan moris neon na’in ba hodi harohan, atu imi keta monu ba babeur. Espiritu hakarak, maibe isin kbiit laek.”

                ⁴² Nia hadook An ba dala rua hodi harohan: “Ha’u Aman, Ha’u sei simu karik kalis ne’e hodi kbiit, ne’e sa halo tuir ita hakarak ba!” ⁴³ Hafoin Nia fila fali hodi hetan sira toba hela, matan dukur. ⁴⁴ Husik tiha sira, Nia hadook An ba dala tolu atu harohan hodi dehan teni liafuan sira uluk. ⁴⁵ Tuir mai Nia fila fali ba nia eskolante sira hodi dehan ba sira: “Oras ne’e imi bele toba hodi deskansa. Oras besik ona atu Oan Mane monu ba ema maksalak sira liman. ⁴⁶ Imi hamriik ba! Ita la’o ona! Ema nebe atu saran Ha’u besik ona mai!”

Sira kaer Jesus

⁴⁷ Jesus sei koalia hela wainhira Judas, sira na’in sanulu resin rua ida, mosu mai ho ema lubun boot nebe kaer surik no ai-dona: sira ne’e, am’lulik boot sira no katuas sira povu nian mak haruka mai. ⁴⁸ Ida nebe atu saran Nia fo tiha sinal ida ba sira, dehan: “Ida nebe Ha’u rei, Nia mak ne’e, imi kaer Nia! ⁴⁹ Nia hakbesik kedas ba Jesus hodi dehan ba nia: “Salve, Mestre!” Hafoin nia rei Jesus. ⁵⁰ Jesus dehan nia: “Belun, o mai atu halo sa ida?” Tuir mai sira hakat ba oin, kaer hodi futu Nia. ⁵¹ Teki-teki Jesus nia eskolante ida losu nia surik, ta am’lulik boot nia atan ida hodi tesi tiha nia tilun ida. ⁵² Jesus dehan ba nia: “Hatama o nia surik ba nia fatin, basa ema hotu nebe kaer surik, sei mate ho surik. ⁵³ O hanoin katak Ha’u la bele harohan ba ha’u Aman atu haruka kedas mai Ha’u  anju lubun sanulu resin rua? Maibe oin sa mak sei sai tuir Eskritura sira nebe dehan katak buat hotu sei sai tuir nune’e?” ⁵⁵ Iha oras ne’e, Jesus dehan ba ema lubun boot: ‘Imi mai hanesan atu kaer na’okten ruma, ho surik no ai-dona atu kaer Ha’u. Loron loron Ha’u tur iha Templu hodi hanorin, imi la kaer Ha’u. ⁵⁶ Buat sira ne’e hotu mosu atu halo tuir Profeta sira nia lia iha Eskritura sira.” Ho ne’e, eskolante sira hotu husik Nia hodi halai lakon.

Jesus iha tribunal

                ⁵⁷ Ema sira nebe kaer Jesus lori Nia ba am’lulik boot Kaifas nia uma; iha neba eskriba sira ho katuas sira povu nian halibur an hamutuk. ⁵⁸ Pedro tuir housi dook to’o am’lulik boot nia kadunan. Tama tiha, nia tur hamutuk ho atan sira atu hare buat hirak ne’e sei sai oin sa los.

                ⁵⁹ Am’lulik ulun sira nia maluk hotu buka namanas lia bosok hasouru Jesus atu saran nia ba mate; ⁶⁰ maibe la hetan, maski mosu sasin falsu barak. Ikus mai mosu sasin rua nebe dehan: ⁶¹ “Ema ne’e hateten: ‘Ha’u bele sobu tiha Maromak nia Templu hodi harii fali iha loron tolu nia laran.’” ⁶² Am’lulik boot hamriik hodi husu ba Nia: “O la hatan buat ida ba lia hirak ne’e hasouru O?” ⁶³ Maibe Jesus nonok hela. Am’lulik dehan teni ba Nia: “Hodi Maromak moris nia naran ha’u husu ba O atu dehan los; O mak Kristu, Maromak Oan, ka lae?” Jesus hatan ba nia: “Ita rasik mak dehan buat ne’e. ⁶⁴ Maibe Ha’u dehan ba imi katak loron ida imi sei hare Oan Mane tur iha kbiit Na’in nia sorin kuana, hafoin tun mai housi lalehan iha kalohan leten.” ⁶⁵ Ho ne’e, am’lulik boot les nia hatais hodi dehan: “Nia koalia aat hasouru Maromak! Ita buka tan sasin sa ida? Imi rasik mak rona nia lia aat. ⁶⁶ Imi hanoin oin sa?” Sira hatan: “Nia soi atu mate!”

                ⁶⁷ Tuir mai sira tafui ba nia oin hodi tuku Nia. Sira seluk basa Nia hodi dehan: ⁶⁸ “Kristu, si’ik to’ok! Se mak baku o?”

Pedro nega Jesus

⁶⁹ La kleur, wainhira Pedro tur dau-daun iha uma oin, atan feto ida hakbesik ba nia hodi dehan; “O mos hamutuk ho Jesus Galileia nian.” ⁷⁰ Maibe nia heli lia iha ema hotu nia oin, dehan; “Ha’u la hatene o koalia kona ba sa ida!” ⁷¹ Nia sai tiha ba odamatan, atan feto seluk hare nia hodi dehan ba sira nebe iha neba: “Ida ne’e mos hamutuk ho Jesus Nazare nian.” ⁷² Dala ida tan nia heli lia ho juramentu: “Ha’u la hatene ema ne’e.” ⁷³ La kleur, sira nebe iha neba hakbesik ba Pedro hodi dehan: “Los duni, o mos nia emar sira ida, basa o nia lia hatudu o nune’e.” ⁷⁴ Nia hahu hotar ho juramentu hodi dehan, “Ha’u la hatene ema ne’e!” Iha oras ne’e kedas, manu kokorek. ⁷⁵ Pedro hanoin kona liafuan nebe Jesus uluk dehan: “Molok manu kokorek, o sei nega Ha’u dala tolu.” Hafoin, sai tiha ba liur, nia tanis ho neon sala.