FEL.

Gran Lunardo, compare. El vol che se fenissa

Come s'ha prencipià, e che tuti stupissa.

Quando che andémo via, l'ha ordenà una tartana;

L'ha laorà in do ore per una setimana.

Ghe xe de le peote, gondole in quantità,

Soni, canti e baloni, e luse in quantità.

Con alegria in laguna staremo infina dì.

TON.

Ma voggio mio mario sentà arente de mi.

FEL.

Cossa gh'aveu paura, che i ve ne magna un toco?

TON.

Eh che no savè gnente, povero sior aloco.

Mi so quel che ho passà, cognosso Giacometo,

E no voggio che el vegna a far de zenochieto.