BET.

Gh'ho gusto in verità.

CAT.

Anderemo anca nu.

ANZ.

De sta sorte de spassi no ghe n'ho abuo mai più.

TONI

Arecòrdete, Cate, che te vôi star darente,

No te vôi sbandonar in mezzo a tanta zente.

S'avemo da sposar; poco ne mancherà;

E avanti de sposarte no voria novità.

TON.

Fe ben, cussì me piase.

ANZ.

Via, sareu più zelosa?

TON.

Eh, ghe xe tempo ancora avanti che el la sposa.

No ghe xe de le gondole? Se s'ha da star fin dì,

Voggio star da mia posta, e mio mario con mi.

AND.

Gh'averè tempo a casa.

FEL.

Sè una gran secatura.

Una muggier zelosa? piutosto in sepoltura.