ATTO SECONDO

Scena Prima. Checca e Toffolo

Camera di Checca.

Checchina - Oe, Toffolo, dove seu?

Toffolo - Son qua, siora, cossa vorla?

Checchina - Caro vu, feme un servizio, andè da Anzoletta sartora, e diseghe cossa che la fa, che no la me porta la mia vestina.

Toffolo - Siora sì, anderò. Me consolo, siora Checca, che la xe novizza.

Checchina - Grazie, fio, grazie.

Toffolo - Basta: gh'ha toccà sta fortuna a Beppo.

Checchina - Poverazzo! El xe tanto un bon putto! El me vol tanto ben!

Toffolo - Eh, ghe ne giera dei altri, che ghe voleva ben.

Checchina - Diseme mo, chi?

Toffolo - Mi giera uno de quelli.

Checchina - Vu?

Toffolo - Siora sì, mi xe da putello in suso che servo paron Toni, e in tutti i so viazi mi son stà sempre co elo, e de mi el se fida più de nissun, e qualche volta el m'ha dà qualche poco de speranza. Basta, ghe vol pazienza.

Checchina - Oh, vedè ben, un paron de tartana volè che daga una so fia a un mariner?

Toffolo - Cossa xelo un mariner? El xe uno che da un momento all'altro pol deventar paron; e po, cara siora Checca, mi so delle belle cosse. Nissun sa i secreti de paron Toni, altro che mi. Mi so come l'ha fatto i bezzi: e de vu so quel che no credè che sappia.

Checchina - De mi? cossa saveu?

Toffolo - Vien Beppo, vago dalla sartora.

Checchina - Oe, parleremo con comodo; vôi che me disè tutto.

Toffolo - Sì, sì, ve conterò. (No ghe dirò gnente. Squasi più ho scoverto quel che ho sempre tegnù coverto). (parte)

Checchina - Sto putto m'ha messo in t'una gran curiosità.