Scena Undicesima. Anzoletta e detta

Anzoletta - Cara siora, compatime se no son vegnua avanti. Gh'ho tanto laorier, che no me posso partir; e po vardè, m'ho ponto un déo, e no posso laorar.

Checchina - Sarave meggio che v'avessi ponto la lengua.

Anzoletta - Oe, come parleu, siora?

Checchina - Diseme, siora pettegola, aveu dito vu che mi no son fia de mio pare?

Anzoletta - Mi no digo busie. Sì ben, l'ho dito.

Checchina - E come lo podeu dir?

Anzoletta - Me l'ha dito a mi siora Catte lavandera.

Checchina - Siora Catte lavandera?

Anzoletta - Sì ben, giusto ella.

Checchina - Oe, la sta qua de casa. Adesso lo so subito.

Anzoletta - Bondì sioria. Mi no vôi pettegolezzi.

Checchina - Vegnì qua; dove andeu?

Anzoletta - Mi vago a casa. Se volè la vestina, mandèvela a tor. (parte)

Checchina - Aspettè, sentì; eh, no m'importa della vestina. Vôi parlar co mia zermana Catte. Oe, ghe seu in casa? (batte alla porta)