SCENA OTTAVA

D. Angelo, poi Nicola, Cesira, indi Felice.

ANGELO (dal fondo a sinistra): Nun l’aggiu pututo truvà!... Aggiu girato pe tutte li qquinte... Distratto stevo ascenno fore a lo sipario... Si nun era pe nu servo de scena che m’ha trattenuto, facevo sta bella figura! Tengo lo vveleno ccà!... Cielu mio fammillo ncuccià!... Stesse da chesta parte? (Via prima a sinistra.)

NICOLA (dal fondo): In iscena... in iscena!... Comparse, spicciatevi!

CESIRA (esce dal suo camerino con mantello e cappello).

NICOLA: Signora prima donna... e che facite vestuta accussì?

CESIRA (nervosa): Me ne vado! Me ne vado! Non canto più! Non canto più! (Via per l’uscita.)

NICOLA (che era rimasto di stucco alle parole di Cesira): Uh! Mamma mia! E comme se fa? (Alla porta, gridando:) Signora prima donna!... Signora prima donna!...

FELICE (dalla seconda a destra): Ch’è stato?... Ch’è succieso?

NICOLA: Guè, Feliciè... stai lloco?...

FELICE: Sò venuto poco primma!... Ch’è stato?

NICOLA: Nu guajo! Na rovina!... La primma donna se n’è scappata! Non canta più!...

FELICE: Puozze sculà!...

NICOLA: Tu e essa!...

FELICE: Ma quanno se n’è scappata?

NICOLA: Mò. A chistu mumento...

FELICE: E pecché?

NICOLA: E chi lo ssape!...

FELICE: E tu la faje scappà?... Jammo! Arrivammola!... (A due gridando:) Prima donna!... Prima donna!... (Escono prima a destra.)