SCENA PRIMA

Felice e Nannina.

NANNINA (vestita come al finale del secondo atto, col mantello addosso. Al levarsi della tela è appena discesa dal muro di cinta in fondo al giardino): Scennite... scennite, maestro... facite ambressa!

FELICE (è ancora sul muro. Anch’esso si trova nelle stesse condizioni del finale del secondo atto): Mannaggia ll’arma de mammeta! Vide si ce sta nisciuno!

NANNINA (viene cautamente avanti e guarda per la scena): Nonsignore, nun ce sta nisciuno... scennite!

FELICE (scende dal muro e viene avanti. Ha un cerotto sul naso): Mamma mia... io nun me fido cchiù! Tengo la freva ncuollo! Se la madre superiora me vede accussì cumbinato, aggiu passato lo guajo!

NANNINA: Dàteme sta mappata... io me vaco a vestì lesto lesto!

FELICE: Tiene ccà... (Le dà l’involto.)

NANNINA: E vuje che ve mettite mò? Certamente nun putite rimane accussì vestuto!

FELICE: E se capisce!

NANNINA (lo guarda. Pausa): Maestro... comme site curiuso! (Ride.)

FELICE: Mò te lo chiavo nu paccaro e felice notte! Guè, chella ride pure! Dopo chesta nuttata ch’avimmo passato, chella piglia e se mette a ridere pure!... Mò aggia vedé che m’aggia mettere. Io nun tengo niente ccà!

NANNINA (raccomandando): Maestro, ricurdateve tutto chello ch’avimmo cumbinato! Pe carità, nun ve scurdate niente!

FELICE: Io m’aggiu scurdato tutte cose! Io sto stunato... lo naso me fa male!...

NANNINA: Comme, chesto che cos’è! Nuje avimmo cumbinato accussì bello! (Riepilogando:) Aiere a li ddoje e trenta partetteme; arrivajeme a Roma all’otto e meza... Appena arrivate a Roma, vuje me dicisteve che se trattava de matrimonio e io facette case de lo diavolo e vulette partì n’ata vota pe Napule, cu l’ultimo treno. Arrivate a Napule simme venute ccà! Ve raccumanno, mò... nun ve mbrugliate!

FELICE: Che m’aggia mbruglià... comme fosse sta gran cosa! (Ripete:) Ajere partetteme a li ddiece e quaranta...

NANNINA: Nonsignore... a li ddoje e trenta!

FELICE: ... a li ddoje e trenta. Arrivajemo a lo Fondo all’otto e mmezza...

NANNINA: Che Fondo?... A Roma!...

FELICE: Ah già... a Roma. Arrivate a Roma, tu sentenno che se trattava de lo maggiore...

NANNINA: Quà maggiore?... Sentenno che se trattava de matrimonio,..

FELICE: Già... sentenno che se trattava de matrimonio, haje fatto casa de lo diavolo e m’haje scummato de sango...

NANNINA: Nonsignore... che state dicenno?... Aggiu fatto casa lo diavolo e aggiu vuluto partì n’ata vota pe Napule!

FELICE: Va buò... aggiu capito... làsseme sta mò... Tu capisci che lo naso me fa male?... Può fare pure cancrena e se ne cade lo naso!...

NANNINA: Io me vaco a vestì!... Stateve attiento! Dicite ch’aggiu chiagnuto tutta stanotte!... Che annummenavo sempe la superiora!

FELICE: Va buono, vattenne... Aspetta, aggiu fatto na penzata: dàmme stu mantiello... Mò veco de rimedià cu chisto!

NANNINA: Vulite lo mantiello?... E avutateve da llà!...

FELICE: Pecché?... Haje da sparà a fiaschelia?

NANNINA: Che fiaschella?... Io me metto scuorno!

FELICE: Mò te dongo lo cappiello nfaccia! Chella l’hanno guardata duimila perzune, mò se mette scuorno!...

NANNINA (insistendo): E vutateve da llà si no nun me lo levo!

FELICE: Ecco quà... (Si volta.) Fa ambressa che po’ ascì quaccheduno!

NANNINA: Facimmo uno, due e tre! Altre ve lo mengo ncuollo e me ne scappo!

FELICE: E ghiammo!

NANNINA: Nun me guardate!... E uno... e due... e due e mezzo...

FELICE: ... e tre manco nu quarto...

NANNINA: E tre! (Toglie rapidamente il mantello che getta addosso a Felice sempre voltato, poi scappa a seconda a sinistra gridando.) Ah... nun me guardate... (Esce.)

FELICE (solo): Mannaggio chi t’ha allattato! Pe causa soja aggiu passato sti quatte guaje! Nun saccio comme aggiu scanzato na palla dinto a li rine! Chella cànchera de primma donna appena me vedette trasì dinto a lo camerino sujo me mettette sotto e me facette nu paliatone numero uno! Niente m’avarria fatto impressione... ma chillu pùnio che me dette ccà ncoppa... (Il naso)... me dispiacette assai! Io me credevo che lo sangue asceva solo dall’interno, ma invece asceva dall’interno e dall’esterno... pecché cu ll’ogne me facette na ferita accussì! Meno male che lo farmacista melo medicaje alla meglio... (Disfatto.) Me sento li rine rutte!... E che se pazzèa. Doppo chella paura, doppo chella currera piglia e miettete a passià tutta la notte p’aspettà che se faceva giorno e ch’arapevano lo canciello de lo ciardino. Ah! Mamma mia!... Mò aggia vedé che m’aggia mettere! (Indossa il mantello e via prima a sinistra.)