SCENA QUINTA

Nannina, Ernestina e detto, poi Direttore indi Gaetano.

ERNESTINA (dal fondo): Neh! Pascà, è accumminciato lo cuncierto?

PASQUALE: Gnorsì, mò stanno cuncertanno la mimica.

NANNINA: E che d’è, nun hanno accumminciato co lo valzer?

DIRETTORE (andando verso la porta delle comparse): Giovinò, facite ambressa che nce simme. (Poi a Nannina ed Emma:) Ah! Vuje site venute finalmente?

ERNESTINA: Direttò, c’avimmo mancato?

DIRETTORE: No, pecché s’è accumminciato da la mimica. Intanto jate mò, jateve a calzà.

NANNINA: Nce avimma vestere comm’aieressera?

DIRETTORE: Nonsignore, nun c’è bisogno, ve calzate soltanto. (Via nel palcoscenico.)

NANNINA: Mò vide a che ora nce ne jammo stammatina.

ERNESTINA: Ajè da dicere ca justo stammatina mammà ha fatto la cucozza co la pasta... sa comme la trovo bella! ( Viano nel palcoscenico ridendo.)

PASQUALE: Le signurine vanno a cucozza co la pasta.

GAETANO: Pascà è venuta?

PASQUALE: Gnorsì, sta dinto.

GAETANO: L’haje ditto niente?

PASQUALE: Nun aggio avuto lo tiempo, pecché s’è miso a parlà cu nu giovene.

GAETANO: Nu giovene?

PASQUALE: Gnorsì, uno che se vuleva vummechià nu poco, ma essa l’ha ditto cierti parole che l’ha fatto rimanè cu tanto nu palmo de naso.

GAETANO: Ah! Neh! Me putarisse fà lo piacere de chiamarla nu mumento?

PASQUALE: E che saccio... moveco... si nun sta cuncertanno.

GAETANO: Vide, agge pacienza, che pò te rialo l’ati sigari.

PASQUALE: Me mettite n’atu soldo mmane!

GAETANO: Nu soldo? Quell’era na lira.

PASQUALE: Eh! Na lira. (Via nel palcoscenico.)

GAETANO: Chella mò nce stanno tanta case, nonsignore ha da essere chella. Nun voglia maje lo Cielo e l’appurarria muglierema. Aieressera, dinto a lo palco, pe dì soltanto: Che bella gamba che tiene la prima ballerina! Me dette na scarpesata ncoppa a lo callo, che me facette chiagnere pe mez’ora!