SCENA PRIMA

Attanasio, indi Amalia e Adelina.

ATTANASIO: Io mò vorria proprio sapè chillo pecché ha ammentata sta mbroglia, ha ditto che Lorenzo ha dato 3 colpe de revolvere a nu giovinotto, e mò isso addò jeva cu chill’atu mbrugliuncello. Eh, io lo diceva nun lo nzurammo, che chisto fa peggio, nun me vulettero sentere. Ah, sta trasenno Amalia e Adelina, lo vurria aiutà quanto cchiù pozzo, ma nun saccio che ha combinato. Basta me regolo seconne l’addimanne che me fanno.

ADELINA: Che veco papà!

AMALIA: D. Attanasio!

ADELINA: Uh, che piacere!

AMALIA: E comme, dicene che v’avevano afferrato pe mariuolo e stiveve ncoppa a la Questura.

ATTANASIO: (Già, jeva arrubbanno mucatore!).

ADELINA: Nun site state arrestato?

ATTANASIO: Io, sissignore, e a vuje chi ve l’ha ditto?

AMALIA: Poco primma, è venuto nu giuvinotto, n’amico de Feliciello, nu certo Arturo, e ha ditto che vuje site stato arrestato pe mariuolo mmiezo Toledo.

ATTANASIO: Ah, Arturo ve l’ha ditto? gnorsì, e proprio così è stato il fatto, è stato nu scambio, m’hanno arrestato invece de n’ato, so’ ghiuto ncoppa a la Questura ma po’ subito me ne so’ scise, e lo primmo pensiero è stato chillo de correre cca.

AMALIA: E quanno site venuto?

ADELINA: Nuje nun v’avimmo visto.

ATTANASIO: So’ venuto quanno vuje stiveve dinto, e appena aggio visto che stiveve ascenno cu Feliciello e Arturo, me so’ annascunnuto dinta a chella cammera.

ADELINA: Uh! E pecché avite fatto chesto, pecché nun v’avite fatto abbedè?

ATTANASIO: Pecché aggio voluto vedè Feliciello che faceva, se ne mostrava dispiacere, e così vedere se doppo nzurato, me vò bene, quanto me voleva bene prima.

AMALIA: Oh! vuje che dicite, D. Attanà, chillo s’è precipitato.

ATTANASIO: L’aggio visto, l’aggio visto!

ADELINA: Appena chillo giovinotto l’ha ditto che jeve stato arrestato, nun vedeva la via de scappà.

ATTANASIO: E bravo e bravo... vogliatelo bene che chillo è nu bravo giovinotto. (E lo primmo galiota, l’aggia rompere li gamme nu juorno de chisto!)

AMALIA: Intanto chillo mò va ncoppa a la Questura e non ve trova.

ATTANASIO: E che fa, se ne vene n’ata vota. A proposito, Lorenzo addò sta?

AMALIA: Lorenzo ha avuto nu biglietto e se n’è scappato de pressa.

ATTANASIO: (Forse la lettera mia). E nun sapite addò è ghiuto?

AMALIA: Io lo saccio addò è ghiuto, e quanno vene il signor D. Lorenzo mi deve dare delle spiegazioni.

ATTANASIO: (Vuò vedè che chesta ha lette la lettera mia e va trova che se crede!). Ma D. Amà, non credete poi... là se tratta de nu bicchiere de vino buono, na cenolella con degli amici.

AMALIA: Già, con degli amici, e delle amiche!

ATTANASIO: Delle amiche?

ADELINA: Eh!

AMALIA: D. Attanà, me dispiace che site vuje e parlate de chesta manera, fra gli amici ci è pure una certa Marietta Cerasella.

ATTANASIO (ad Adel.): Marietta Cerasella?

ADELINA: Eh!

ATTANASIO:Eh,che!

AMALIA: D. Attanà, scusate, questo poi da voi non me l’avrei mai aspettato, un uomo della vostra età commette e permette che n’ommo nzurato lassa la mugliera e va... Oh, scusate, ho perduta tutta la buona opinione che io aveva di voi. (Via.)

ATTANASIO: Adelì, figlia mia, chella che dice, io nun aggio capito niente!

ADELINA: Eh, nun avite capito niente, e pecché avite ditto: la cenolella, gli amici, le amiche.

ATTANASIO: Ma chi ve l’ha ditto le amiche... lo state dicenno tu l’ha ditto essa.

ADELINA: Vuje manco nce parite, site fatto viecchio e ghiate ancora appriesso a li ceraselle.

ATTANASIO: No, vaco appriesso a li percoche!

ADELINA: Va trova che nce tenite ncuorpo?

ATTANASIO: Oj neh, io ncuorpo nun nce tengo niente! Sta Marietta Cerasella chi la conosce!

ADELINA: Io mò che ne saccio, che vulite che ve dico, quacche cosa nc’ha da essere, Amalia non è femmena che se nganna.

ATTANASIO: E s’inganna sicuro, pecché sta Marietta Cerasella io mò la sento annommenà. Dì la verità, Amalia ha liggiuta la lettera che io aggio mannata a Lorenzo?

ADELINA: Avite mannata na lettera a Lorenzo? Io non ne saccio niente.

ATTANASIO: Comme, l’affare de Casoria, la compra de la massaria?

ADELINA: Nonsignore, chesto Amalia nun lo ssape.

ATTANASIO: Ah, nun lo ssape? E va buono, allora chella pecchesto ha parlato accossì. Lo biglietto ch’ha avuto Lorenzo, nce l’aggio mannato io, e chella la mugliera s’ha creduto che nce l’aveva mannato sta Marietta Cerasella. Noi dobbiamo andare io e Lorenzo a Casoria per la compra di una masseria, hai capito?

ADELINA: Aggio capito.

ATTANASIO: Chillo Lorenzo, sarrà ghiuto primma a fà quacche servizio e poi veneva a lo cafè addò l’aggio dato l’appuntamento, chillo mò là me starrà aspettanno. Adelì, va dinto addò Amalia e dincello, che non pensasse a male, perché il marito sta con me.

ADELINA: Va bene, va bene... io chesto voleva dicere, papà a quell’età jeva facenne ancora scostumatezze. (Via.)

ATTANASIO: Va trova chillo cancaro de Lorenzo che pasticcio avarrà fatto, chi sarrà sta Marietta Cerasella? Li scappatelle ogni marito l’ha da fà, ma s’hanna sapè fà, chillo se fà appurà ca la Cerasella... basta, lasseme j lo cafè, che chillo là me starrà aspettanno. (p.a.) Che beco! Muglierema nzieme cu Feliciello e Arturo, si chella me vede mò nun me fa j cchiù a Casoria, mò m’annasconno ccà dinto, quanno loro so’ trasute, io me ne vaco. (Via seconda a destra.)