SCENA QUARTA

Felice, poi Raffaele.

FELICE: Sangue de Bacco, tanto aggio fatto che pure ccà so’ venuto... mò moro, nun me fido cchiù de correre, ma nce l’aggio fatto caspita: Felì, jammece a cuccà — jammo mugliera mia, erano all’8 e meze, vedete un giovine all’8 e meza pò tenè suonno, e po’ stanno cu chillo pensiero ncapo. Che buò durmì... me so’ curcato pe nun le dà sospetto de niente, quanno aggio visto che durmeva a suonno chino, zitto zitto, so’ scise, me so’ vestuto, e me ne so’ scappato, ma cu li panne che teneva pe la casa però, e comme faceva? Lo cumò comme l’arapeva, si faceva rummore chella po’ essere che se scetava e felicenotte — me so’ miso a correre pe la strada comme a nu pazzo, chille duje guardie m’hanno pigliato pe mariuolo, m’hanno afferrato e m’hanno addimmannate tanta cose, dove andate? io sono un galantuomo, vado a na festa de ballo. Comme, a na festa da ballo, e andate di questa maniera? Scusate, ma cheste so’ cose curiose, e se io nun tengo che me mettere, e si nun aggio avuto tiempo de me vestì, volete entrare nei fatti miei. Basta, dopo tanta chiacchiere, se ne so’ ghiute, e io me so’ mise a correre n’auta vota, finalmente so’ arrivato — ma comme faccio, comme me presento dinto de chesta manera, che figura faccio, aspetta ccà ncoppa stanne diverse scemise, mò me ne metto una de chiste, si quaccheduno lo conosce ch’è lo suio io dico: Oh, scusate, ho sbagliato.., me credeva ch’era il mio. (Si mette lo scemise con lazzi.) Me va nu poco largo, nun fa niente, pare sempe meglio de comme steva primmo. Stu cappiello è meglio de lo mio... mò poso chisto, e me piglio chisto. (Si mette un cappello alto e mette il suo sul tavolo.) Me pare nu cucchiere appadronato!

RAFFAELE (esce, va a prendere la guantiera dei dolci e fà per andare da dove è uscito, vede Felice): Voi chi siete?

FELICE: Sono un signore qualunque.

RAFFAELE: E chi vi ha invitato?

FELICE: M’ha invitato n’amico mio.

RAFFAELE: N’amico vuosto? E addò sta st’amico vuosto?

FELICE: Non lo sò, forse sarà venuto prima, starà dentro.

RAFFAELE: Starà dentro? E ccà che stiveve facenno?

FELICE: Stava aspettando chi sa usciva.

RAFFAELE: E nonsignore, favorite dentro, qua che nce fate. (Fosse nu mariuolo!) Trasite, trasite, cca, che nce facite. (Guardandolo sospettoso.) (La faccia de mariunciello la tene!) (Via.)

FELICE: E chisto pure pe mariunciello m’ha pigliato! Và, lasseme trasì dinto, che me parene mill’anne che veco a Marietta. Eccomi signori. (Via.)