SCENA PRIMA

Amalia ed Adelina.

AMALIA (trasportando Adel.:pel fondo): Ma viene ccà, Adelina mia, tu m’haje ntiso sempe, mò che saccio nun me daje audienza, e sieguita a te piglià collera.

ADELINA: Amà, ma tu sì curiosa, comme, io me sceto, nun me trovo a maritemo vicino, lo vaco trovanno pe tutta la casa, nun lo trovo, nun saccio che se n’è fatto, e vuò che stongo de buon’umore, e nun me piglio collera. Aggio pacienza, cheste sò cose che se dicene pe calmà na persona, ma nun se sentene!

AMALIA: Ma viene ccà, conteme lo fatto, ve fusseve appiccecato aissera?

ADELINA: Addò, maje comm’aissera, nce simme curcate cu tanto buon’umore, dinto a lo lietto nce avimmo parlato de tanta belle cose, isso po’ doppo na mez’ora me dicette: Adelì, perdoneme si m’addormo, pecché nun me fido de tené cchiù l’uocchie apierte, io pure steva stanca e nce addormetteme. Stammatina, quanno me sò scetata, sò ghiuta pe vedé, e a lo pizzo sujo, mmece d’isso, nce steva nu cuscino commigliato co lo lenzulo. Figurete, nun sapeva a che penzà, sò scesa, me credeva che steva dinto all’ate cammere, sò ghiuta vedenno e nun l’aggio trovato a nisciuna parte!

AMALIA: Vuje vedite, ma nun te piglià collera, siente a me, quacche combinazione se sarrà data — embè, Lorenzo maritemo nun è stato pure fore le casa fino a li 3 doppo mezanotte.

ADELINA: Ma Lorenzo è stata n’ata cosa. Lorenzo ascette aissera, e s’è ritirato stanotte; ma Felice no, Felice se cuccaje, pò s’avetta sosere e se n’ascette. Và trova addò sarrà ghiuto lo galantuomo! Lorenzo frateme me lo diceva: Adelì, sora mia, nun te lo piglià, pecché chisto doppo nu mese accommencia a te fà piglià collera, e accussì è stato! Io me credeva che me voleva bene, me credeva che ghieva pazzo pe me... Ah! Nfame, nfame! (P.a. a s.)

AMALIA: Ma viene ccà, Adelì...

ADELINA: Amà, lasseme stà, lasseme sola... voglio sfucà, voglio chiagnere sola. Te volarria vedè a te nella mia posizione; comme, na mugliera doppo nu mese sposato, se vota dinto a lo lietto e nvece de lo marito trova lo cuscino, agge pacienza, sò cose troppo dolorose! (Via piangendo.)

AMALIA: Have ragione poverella, chi la pò dà tuorto!