SCENA QUINTA

Lorenzo, Dorotea e detta.

DOROTEA: No, D. Lorè, vuje nun me facite capace, vuje m’avita dicere che mbruoglio avite fatto cu maritemo. Quanno maje Attanasio nun s’è ritirato na notta sana, quanno maje, chesta è stata la primma vota doppo 20 anne de matrimonio.

LORENZO: Ma signora mia, io che ve pozzo dicere... io nce parlaje... che saccio ch’aveva j a Casoria per la compra de na massaria... anzi, si, mò me ricordo... me voleva purtà pure a me... ma chesto fuje paricchio tiempo fa... po’ nun se ne parlaje cchiù, credo che là avetta j aiere.

DOROTEA: No, D. Lorè, io nun sò femmena che me faccio mbruglià tanto facilmente, maritemo non è ghiuto a Casoria!

LORENZO: E non è ghiuto a Casoria, vuje che vulite da me!

AMALIA: D. Dorotè, ccà songo na maniata de mbrugliune, accommincianno da Feliciello, e fenenno al Signor Lorenzo, qui presente!

LORENZO: Comme... io...

AMALIA: Sì, tu... Dimme na cosa: Stanotte la festa de ballo t’è piaciuta?

LORENZO: La festa de ballo?

AMALIA: Già, nce steva pure D. Feliciello!

LORENZO: Ah, te l’hanno ditto? (Ridendo.)

AMALIA: E che te credive che li cose nun s’appuravene? Sicuro che me l’hanno ditto... birbante, assassino! Ma vide chello ch’haje da fà, pecché io nnanz’a te nun nce voglio stà cchiù.

DOROTEA: E me pare che have ragione!

LORENZO: Ma piezza de stupita che sì... t’hanno ditto che sò ghiuto a la festa de ballo, ma pò nun t’hanno ditto pecché nce sò ghiuto?

AMALIA: Pecché nce sì ghiuto? Pe te j bommecà cu chelli quatte culumbrine!

LORENZO: Nonsignore, io aveva appurato che Feliciello aveva j là, e pe sorprenderlo nce sò ghiuto... e quanno l’aggio visto, l’aggio fatto na lezione che se la ricordarrà fino a che more, pecché io nun pozzo vedé che na sora mia è trattata ‘e chella manera!

AMALIA: Possibile! E te pozzo credere?

LORENZO: Ma m’haje da credere pe forza, mugliera mia!

AMALIA (cacciando il biglietto di visita): E stu biglietto ccà, chesta pecché te l’ha mannato?

LORENZO (legge il biglietto): Ma chisto ccà nun l’aggio ricevuto io, tu addò l’haje trovato?

AMALIA: Ncoppa a na seggia.

LORENZO: Embè, chisto l’avette d’avè Feliciello, e po’ se lo scurdaje ncoppa a la seggia.

AMALIA: E quanno aviste chillo biglietto, che te ne scappaste de pressa, de chi era?

LORENZO: Era la lettera che io me credeva che m’aveva mannata D. Dorotea, e po’ va trove chi pazziaje!

AMALIA: Proprio accossì?

LORENZO: Proprio accossì!

AMALIA: Allora, marito mio, perdoneme!

LORENZO: Ma nun nce penzà, che io te voglio bene!

DOROTEA: Ma vuje a Casoria...

LORENZO: Mall’arma de Casoria!

DOROTEA: Scusate, vuje site curiuso, io nun saccio maritemo addò ha passata la nottata, sò stata mpensiero, me vutava da ccà, me vutava da là dinto a lo lietto, e me trovava sempe sola.