SCENA SECONDA

Giulietta e detta.

GIULIETTA (di dentro): Aprite, aprite, sò io.

ROSINA: è Giulietta.

MARIUCCIA (va ad aprire): Ah, sì venuta finalmente!

GIULIETTA: Vuje nun sapite che m’è succieso!

LE DUE: Ch’è succieso?

GIULIETTA: Primma de tutto, avita sapé che ziema nun me voleva fà ascì assolutamente, pecché lle sò ghiute a dicere che io, la sera, faccio ammore ccà. Io l’aggio ditto: ma nonsignore, sò chiacchiere, sò gente che me vonno male. Niente, tu da ccà nun jesce... Ha chiuso la porta cu la chiave e s’è ghiuta a cuccà.

MARIUCCIA: Uh, e comme haje fatto?

GIULIETTA: Quanno aggio visto che essa durmeva a suonno chino, zitto zitto m’aggio pigliata la chiave da sotto lo cuscino e, ntela, me ne sò scappata per non mancare all’appuntamento. E comme potevo stà stasera, senza vedè a vuje?

ROSINA: Cioè, cioè, pe vedè a nuje... Pecché nun dice pe vedé a D. Feliciello?

GIULIETTA: La verità, primma pe vedé a isso, e po’ a vuje. Oggi l’aggio mannato nu biglietto lo solito cafè, dicennole che stasera ccà ce steva na cena, che fosse venuto senza meno e che avesse portato lo piatto sujo.

MARIUCCIA: E lo stesso aggio fatto io cu D. Camillo.

ROSINA: A D. Fortunato io nce lo dicette da ieri. Ma, sapite che sto penzanno? Chille nun sanno che veneno tutte e tre ccà. Ognuno se crede ch’è isso sulo.

GIULIETTA: E che fà? Stasera faranno la loro conoscenza.

MARIUCCIA: Ah, ah, ce ne vulimme fà resate! Neh, io vaco a sciuscià lo ffuoco... Vuje affacciateve, vedite si veneno. (Via seconda a sinistra.)

ROSINA: Neh, Giuliè, e tu ch’haje fatto cu Ciccillo lo guantaro? Te ncuieta cchiù?

GIULIETTA: Uh, e che ne saje, Rusina mia! Quanno è la dummeneca, nun fà ato, tutta la jurnata, che passià sotto a lo balcone mio! Ma nun ne caccia niente cchiù, però.

ROSINA: Ma pecché t’appiccecaste?

GIULIETTA: Non era cosa, Rusina mia! Nu fruscione... nu jucatore... Pe nu niente s’appicceca, pe nu niente caccia lo revolvere... È stato carcerato ddoje vote... Te pare che me spusavo a isso? Appunto dummeneca passata lle sbattette lo balcone nfaccia! Io credo che se sarrà fatto capace.

ROSINA: Haje fatto buono, haje fatto buono... (Bussa il campanello.)

GIULIETTA: Chi sarrà?

ROSINA: Chi è?