SCENA OTTAVA

Concettella, e detti.

CONCETTELLA (con premura): Signò, signò...

PASQUALE: Che è stato?

CONCETTELLA: Eh! che è stato? mò certo m’avita dà la meza lira.

PASQUALE: Pecché?

CONCETTELLA: Primme de tutto, la signora se sta vestenno nzieme co la figlia vosta, e ve manna a dì che vò ascì no poco.

PASQUALE: Va bene, quanno so’ pronte dincello che scennessero che io l’aspetto ccà bascio.

CONCETTELLA: Vulite che scennesere ccà?

PASQUALE: Sissignore.

CONCETTELLA: Va bene, io accussì le dico. Po’ avita sapé, tanta la signora, quanto la figlia vosta, vedenno a chillo giovene che sta ncoppa, l’hanno addimmannate tanta cose, e po’ all’urdemo l’hanno reduto nfaccia. Io appena aggio visto chesto, aggio ditto mò nce l’aggio j a dì a lo patrone.

PASQUALE (freddamente): Già, haje ragione, haje fatto buono; ma da oggi in poi non te n’incarricà de chillo giovene, lassalo j.

CONCETTELLA: Comme! Chelle l’hanno reduto nfaccia?

PASQUALE: E che fa, non te n’incarricà.

CONCETTELLA: Eh, quanno lo dicite vuje li ficosecche me li vulite dà?

PASQUALE: Nonsignore, basta mò, te n’aggio date assaje, po’ te fanno male.

CONCETTELLA: Comm’è, manco li ficosecche pozzo avé? Embè, nuje avimmo fatto lo patto?

PASQUALE: Che patto! Non me rompere la capa! Lasceme sta! Va munne quatte ammennole nzieme co Gennarino llà dinto. (Mostra a sinistra)

CONCETTELLA: Comme! Non aggio da j ncoppa?

PASQUALE: Ninsignore, va mmunne l’ammennole t’aggio ditto.

CONCETTELLA: Va bene. E la mmasciata a la signora chi nce la fa?

PASQUALE: Quà mmasciata?

CONCETTELLA: Che quanno so’ pronte hanno da scennere ccà?

PASQUALE: Ah, già, allora và nce lo dice.

CONCETTELLA: Eccome ccà. (Io pe me non ne capisco niente cchiù.) (Via.)

PASQUALE: Gnazio mio, io te ringrazio, tu m’haje fatto riflettere na cosa che io comme a no ciuccio, non nce aveva pensato. (Ignazio passeggia turbato e non gli bada.) Chi meglio d’isso me po’ sta attiento a moglierema, e io intanto pozzo fà li fatte mieje, pozzo sta sicuro de pensiero... Gnà, ched’è, che è stato?

IGNAZIO: Niente Pascà, me so’ attaccato li nierve.

PASQUALE: Ma, caro Gnazio, tu ne potarrisse fà a meno de te piglià collera, te pare che io te poteva cedere a chillo giovene, era impossibile.

IGNAZIO: Io te l’aveva cercato come favore.

PASQUALE: Ma è no favore che io non te pozzo fà.

IGNAZIO: E va bene.

PASQUALE: Ah, eccolo ccà.