IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
Ignazio e detti, poi uno Sguattero con vivandiera.
IGNAZIO: Eccome ccà, hanno tuzzuliato?
ELENA: Nonsignore, siente a me. Io vaco a mangià a casa de zì Angiolina, e stasera sto pure llà, pecché c’è festa da ballo. Mò che vene Procopio dalle stu biglietto, e ccà sta tutto spiegato.
ELENA: Ma tu nun haje da dicere che me so’ ritirata, che zizia è venuta ccà, haje da dicere che stu biglietto l’ha purtato nu guaglione... mò avvisammo pure lo guardaporta.
IGNAZIO: Ah! Va bene, aggio capito! (Prende il biglietto.)
ANGELICA: Va buono, jammoncenne. Cavaliere, andiamo.
FRUVOLI: Sono con voi.
ANGELICA: Cesare, tu te ne cali?
CESARE: Eccomi qua.
ELENA: Ignà, tu mò m’haje ntiso? T’arraccumanno?
IGNAZIO: Non dubitate. ( Viano tutti meno Cesare ed Ignazio.)
CESARE (dopo pausa): Ignazio, io t’avarria parlà.
IGNAZIO: A me? E che m’avita da dicere?
CESARE: Tu mi dovresti fare un favore, ma questa è una cosa che deve passare fra me e te.
CESARE: Siccome io ce l’ho con D. Procopio, il marito di mia cugina per certi fatti che tu saprai dopo insomma è un odio che io tengo da tanti anni... mi era venuta l’idea una sera di queste, quando si ritirava uscirgli di faccia e dargli una pugnalata.
IGNAZIO: Guè, comme l’avesse dato nu sacario!
CESARE: Ma poi ho pensato che si trova qualche guardia, mi arresta e passo nu guaio!
CESARE: Io ti vorrei dire: Tu che dormi in casa, si me potive fà nu piacere, na notte de chesta, stanotte, dimane a notte, quando ti resta comodo di andare zitto zitto vicino al letto e strafucarlo, io poi la mattina vengo, trovo ch’haje fatto lo servizio e ti regalo.
IGNAZIO: D. Cè, io credo che vuje site asciuto ampazzia. Io vaco vicino a lo lietto de lo patrone e lo strafoco? Vuje silo dicite n’ata vota me vene la convulsione, io nun tengo lo curaggio d’accidere manco na gallina, e po’ lo guaio nun lo vulite passà vuje, e me lo vulite fà passà a me.
CESARE: Pss... non ne parliamo più, io ti facevo più di coraggio.
IGNAZIO: Niente affatto, io stu coraggio lloco nun lo tengo!
CESARE: Va bene, mò tiene troppe chiacchiere mò! Penserò io diversamente, e zitto su questo che ti ho detto sà, zitto! (Via pel fondo.)
IGNAZIO: Vuje vedite che se passa! Io nun sapeva che vuleva! Jeva vicino a lo lietto de chillo e lo strafucavo! Vì che pazzo! A proposito, mò siente a D. Procopio quanno legge sta lettera, sà che se fa afferrà! No, ma io mò che faccio? Nce la dongo doppo mangiato, pecché si la legge primma, nuje nun mangiammo cchiù, e io me sento na debolezza che mò moro!
SGUATTERO (con grande vivandiera in testa di d.): È permesso?
IGNAZIO: Chi è? Uh! Lo giovane de lo trattore, chillo pazzo ha rimasto la porta aperta. Trase, trase llà dinto a la cammera de mangià, caccia tutto cose e preparale ncoppa a la tavola.
SGUATTERO: Va bene. (Via a destra.)
IGNAZIO: Che bella cosa! Che odore! Me sento venì na cosa!