SCENA TERZA

Michelino poi Felice.

MICHELINO: Ma chillo D. Peppino è n’affare serio, sapite, afforza me vò fa fà na spiegazione amorosa a D.^a Rusinella; io nun capisco pecché, pe quà ragione. Pozzo avé pure na cancariata, e me pozzo pure ncuità. E po’ chella Teresina, nun me leva l’uocchie da cuollo. Da stasera me stà dicenno, ricordateve la condizione, si vulite che ve dongo a Teresina, avita fà chello che v’aggio ditto... Facite cerimonie a la sposa, accustateve, parlatece. Ma chello nun me vene, c’aggia fà... Mò l’aggio fatto na mossa accussì. (Fa segno con l’occhio.) Pe la fà ascì ccà fore, sperammo c’avesse capito. E mò che vene che le dico? Ah, ecco cca, D.^a Rusinè, io so’ nu giovene... che quanno veco na giovene... che sia, na giovene, quanno veco na stella... ma che stella... quanno veco na luna! na bella luna! Ma che nc’azzecca stà luna... D.^a Rusinè, poche chiacchiere, vuje m’avite apierto nu fuculare dinto a stu core... Bravo, accussì... Nu fuculare, na carcara de fuoco, che senza che nisciuna la scioscia, abbruscia, abbruscia, e se fà sempre cchiù grossa! Seh, accussì va buono... po’ l’atu riesto vene mano mano. Vuje m’avite apierto nu fuculare dinto a lo core, na carcare de fuoco, che senza che nisciuno la scioscia...

FELICE (uscendo dal fondo a destra): Che so’ sti lampiuncielle butteglie de vino, biscotte... E chillo chi è ?

MICHELINO: Na carcara de fuoco, che senza che nisciuno a scioscia, abbruscia, abbruscia... (Si volta.) (Sangue de Bacco lo marito!). Bonasera.

FELICE: Bonasera, scusate, vuje chi site?

MICHELINO: Michelino Zeppolella, pittore e stuccatore, so’ venuto da poco dinto a stu paese, co lo princepale mio, pe rinnovà la facciata de lo Municipio. Tutto è fatto, avimma fà sulo lo cumicione.

FELICE: Ah, bravo. E comme ve truvate ccà?

MICHELINO: So’ venuto nzieme cu D. Peppino lo cafettiere, lo quale è stato invitato da la sposa.

FELICE: Ah, aggio capito mò. La sposa ha data sta festa, e ha invitato pure a D. Peppino lo cafettiere, nzieme cu D. Peppino site venute vuje.

MICHELINO: Ecco, bravo! Ma che serata allera, che divertimenti, lo vino li biscotte se so’ ghiettate, nce l’avimmo menate proprio pe la faccia, che core che tenite, che sciampagnaria, avita campà, cient’anne, vuje e la mugliera vosta!

FELICE: Grazie. E nce stanne gente assai dinto?

MICHELINO: Eh, mò nun tanto, pecché na bona porzione se ne so’ ghiute, ma n’ora fa, nce stevene cchiù de 70 perzune.

FELICE: E che ne parlammo a fà, aggio aperta la cantina. (Ma comme, senza permesso mio, che songo lo patrone de casa, senza che ne saccio niente, se mette a mmità gente, e a fà chesta ammuina, allora io ccà dinto songo lo si nisciuno!).

MICHELINO: La verità, tenite na bella casa, e comme fa bella tutta illuminata. Che core che tenite, che sciampagnaria! L’uommene comme a buje, nun hanna mai murì!

FELICE: Faciteme lo piacere chiammateme a Rosina, facitela ascì nu mumento.

MICHELINO: La mugliera vosta? Subeto, me faccio nu pregio... Vuje m’avita cummannà sempe, io nun songo ato che nu servitoriello vuosto. Ve vaco subeto a servì.

FELICE: Grazie tante.

MICHELINO: (Me so’ fatto amico de lo marito, aggio fatto lo colpo!). (Via a sinistra.)

FELICE: Si nun me faccio sentere a lo principio, chesta se ne piglia, e stateve bene. Si è mò e se mette a dà feste, senza permesso mio, appriesso cha da fà? M’ha vuluto? Lo patre pe forza m’ha vuluto fà spusà, e mò ha da stà sottoposta a me. Stanotte aggio fatta a nuttata chiara chiara ccà fore, me sento acciso... ma c’aggia fà, io nun nce tengo premura, nun me tira... So’ stato a Napole, currenno da ccà e da llà tutta la jurnata. Io steva tanto bello ccà dinto, sulo, chi se puteva mai credere c’aveva passà chistu guajo!