SCENA QUINTA

Michelino e detto, poi Felice.

MICHELINO: D. Peppì, state ccà? Ve stò ghienno truvanno pe tutte parte.

PEPPINO: E io pure ve jeva truvanno.

MICHELINO: Lo cafè m’hanno ditto che stiveve ccà, e subeto so’ venuto.

PEPPINO: Sì curruto? Pecché? M’haje da dicere quacche cosa?

MICHELINO: No, vuleva vedé.

PEPPINO: (Nun tengo curaggio d’addimannà, me tremmene dint’e gamme).

MICHELINO: (Nun lo voglio dicere che ajssere avette duje schiaffe, si no, stateve bene!).

PEPPINO: E accussì... D. Micheli... nun me dicite niente? A che stamme cu chill’affare?

MICHELINO: Ah, cu chill’affare? Eh... cammina.

PEPPINO: Ajssera ve facisteva dà l’appuntamento?

MICHELINO: Se capisce. All’11.

PEPPINO: All’11? E nce isteve?

MICHELINO: Se, sape, embè, comme nun nce jevo.

PEPPINO: Essa v’arapette la porta?

MICHELINO: Immediatamente!

PEPPINO: E po’?

MICHELINO: E po’... (Si mò le dico c’avette li schiaffe, perdo a Teresina.) E po’... sentite... la cosa è delicata, vuje vulite sapé tutto?

PEPPINO: Si, tutto!

MICHELINO: Vedimmo si nce stà nisciuno. (Precauzione.)

PEPPINO: Nun nce stà nisciuno, mò chiudo pure la porta. (Chiude a chiave la porta di fondo.)

MICHELINO: Stamme sule?

PEPPINO: Stamme sule.

MICHELINO: POZZO parlà?

PEPPINO: Parla, mall’arma de mammeta!

MICHELINO: Nce so’ riuscito!

PEPPINO: (Ah, aggio fatto lo guajo!).

MICHELINO: E mò, D. Peppì, faciteme spusà subeto a Teresina?

PEPPINO: Che? Che dice? Spusà a Teresina? Ma tu, credo, che sarraje pazzo! Te faccio spusà a Teresina dopo chello che hai fatto?

MICHELINO: Uh! Mamma mia! Vuje pe forza me l’avite voluto fa fà.

PEPPINO: E tu non l’aviva fà, io t’aggio vuluto sperimentà, aggio vuluto vedé comme la pensave, nepotema nun sarrà maje la mugliera toja!

MICHELINO: (E allora mò le dico la verità). Aspettate. D. Peppì, io v’aggio ditto na cosa pe n’ata...

FELICE (dal finestrino in fondo): Distratto aggio rimasto lo bastone, e m’aggio purtato lo ventaglio.

MICHELINO: Avita sapé che appena trasette...

PEPPINO: Zitto, nun te voglio sentere cchiù, chella è la mugliera de l’amico mio D. Felice, capisce? Nun aviva fà mai chello c’hai fatto.

MICHELINO: Io nun aggio fatto niente.

PEPPINO: Nun hai fatto niente? Lo dice mò chesto, ma poco primme hai confessato tutto però. Hai profittato ca lo marito nun nce steva, e all’1l hai tuzzuliato la porta, t’hai fatto arapì, e sì trasuto dinto a la cammera soja.

FELICE: Che sento!

MICHELINO: Lo marito!

FELICE: Nun lo facite fuì, tenitelo. (Scompare dal finestrino.) Lo voglio rompere li gamme! (Gridando.)

MICHELINO: E chesto nce mancarria!

PEPPINO: Vedite la combinazione!

FELICE (di dentro): Aprite la porta!

MICHELINO: Nun arapite, si no dico che site stato vuje che me l’avite fatto fà.

PEPPINO: No, pe carità!

FELICE: Aprite sta porta, si no la scasso! (d.d.)

MICHELINO: Annascunniteme a quacche parte.

PEPPINO: Ccà, dinto a stu stipo, facite ambresse. (Apre lo stipo e vi chiude dentro Michelino, poi va ad aprire la porta in fondo.)