SCENA ULTIMA

Luisa, Bettina, poi Peppino e Teresina, poi Biase, Salvatore e detti.

LUISA: Che beco! State abbracciate? Bravo! Accussì ve voglio, vò dicere c’avite fatto pace?

RUSINELLA: Sì, cummara mia, ha jurato che nun me fà piglià cchiù collera.

FELICE: Mai cchiù!

LUISA: Bravissimo!

BETTINA: Che piacere che n’aggio avuto.

PEPPINO (uscendo con Teresina): Comme! Era la mugliera?

TERESINA: Sissignore. Chillo che io arapette, era Michelino.

MICHELINO (uscendo dallo stipo): E me diste duje pacchere.

TERESINA: E se capisce, pecché tu nun avive...

PEPPINO: Basta, nun ne parlammo cchiù. Io accunsento a farve spusà.

TERESINA: (Ma comme zi zì, chillo...).

PEPPINO: (Statte zitto, po’ te conto tutte cose...).

BIASE (uscendo con Salvatore): L’avvocato ha ditto che mò vene, se steva vestenno.

LUISA: E che vene a fà l’avvocato?

BIASE: Pecché figliema s’ha da spartere da lo marito.

SALVATORE: Accussì non ponno stà.

RUSINELLA: No, papà, nun nce spartimmo cchiù, tutto s’è mise nchiaro. Da oggi in poi nce vulimmo bene, e nun facimmo cchiù quistione.

BIASE: Veramente?

FELICE: Sissignore, mò me la piglio, e me la porto a casa.

PEPPINO: Io ve lo diceva, chesto so’ cose che s’acconciano.

SALVATORE: So’ appicceche che fra marito e mugliera fenescene a brenna!

BIASE: E avite fatte pace?

RUSINELLA: Sì, papà. (Abbraccia Felice.)

BIASE: Dateme lo curtiello.

FELICE: Tenite, aggio sparagnata na zumpata!

BIASE: Venite ccà, strigniteme dinto a sti bracce figli miei cari. (Abbraccia Felice e Rusinella.)

TUTTI: Bravo! bravo!

BIASE: D. Felì, ve raccummanno mò, nun facite cchiù chiacchiere, cercammo de nun fà ridere cchiù la gente.

FELICE: Bià, siente. Ricordate chesto che te dico: Lo juorno che nun facimmo ridere cchiù la gente... chiagnimme nuje!

(Cala la tela.)

FINE DELL’ATTO TERZO

FINE DELLA COMMEDIA