SCENA SECONDA

Concetta e dette.

CICCILLO (dalla destra; è irritata): Mò vedimmo si nun te lasso e me ne vaco! Mò vedimmo si nun so’ femmena de mantenà la parola!... Donna Rusì... scusate si sentite sempe chiacchiere e si ve vengo sempe a seccà! Ma che vulite... stamme a pporta de casa... nun cunosco a nisciuno e a forza cu vuje aggia venì a sfucà nu poco!

ROSA: Chesto che cos’è... vuje site la padrona de trasì... sempe che vulite!... Ma ch’è stato, avite fatto quistione cu D. Michele!

CONCETTA: Nun me fido cchiù de lo suppurtà, D.ª Rusina mia! S’è fatto n’ommo impossibile! Io nun me so’ mmaretata certamente pe fà la serva... Sempe dinto a la casa... sempe dinto a la casa... e isso pò vò fà chello che le pare e piace! Aggio obbligazione a zìemo ca pe fforza me lo vulette fà spusà: «Chillo è architetto... tene na bella prufessione... è nu buono giovine... Pigliatillo... Pigliatillo...». E tante me ne dicette fino a che me facette nguajà!

LUISELLA: Signò, lo ssentite? E vuje ve lagnate de D. Felice.

ROSA: No, Feliciello mio pò nun è accussì... Feliciello nun va ncampagna, nun va a nu divertimento si nun me porta a me! Tanta vote songh’io che me secco!

CONCETTA: E chesto è chello che cchiù me fa attaccà li nierve... pecché dico accussì: comme, io ca so’ figliola, aggia essere trattata de chesta manera... e na femmena avanzata ha avuta avé chella sorte!

ROSA: Qua non c’entra la femmena avanzata!... Quanno lo marito vò bene a la mugliera nun ce bada a quacche anno de cchiù!

CONCETTA: (Quacche anno de cchiù?... Chella ne tenarrà na ventina cchiù d’isso!...).