SCENA TERZA

Peppeniello e detto.

PEPPENIELLO (esce dalla destra, guarda Felice e fa la faccia di pianto, col fazzoletto in mano).

FELICE: Tu me chiude la vocca de lo stommaco.

PEPPENIELLO: D. Felì, aggio penzato, mò m’accatto nu soldo de fiammiferi, piglio le capuzzelle, le squaglio dint’a ll’acqua pò me le bevo e moro.

FELICE: E nun ce arrive cu nu soldo, nce ne vonno almeno 6 solde, pecché mò ogne paccotte nce ne stanno appena na decina. Ma ch’è stato?

PEPPENIELLO: È stato che nun me pozzo fà capace, penzo sempe a Teresina mia.

FELICE: Hai ragione, io ti posso compatire, quelle donne di campagna tengono cuore veramente.

PEPPENIELLO: E c’aggia fà?

FELICE: E che te pozzo dicere caro Peppeniello, a te si tratta di cambiare posizione.

PEPPENIELLO: E io nun la voglio cagnà sta posizione; aggia dà cunto a voi?

FELICE: A me? E che me ne preme?

PEPPENIELLO: E si me nfoco, ve piglio a mazzate sà?

FELICE: E io si me ne vaco e capo te chiavo belli cauce sà?

PEPPENIELLO: Zi zio addò sta?

FELICE: Sta a chella parte.

PEPPENIELLO: Puzzate sculà. (Via a sinistra.)

FELICE: Tu e isso! Vuje vedite chillo che vò da me.