SCENA QUINTA

Errico, Annina e detti.

ANNINA (in abito da festa): È inutile caro Marchesìno, voi perdete il tempo, non mi convincete più. Vuje ve credite che io so’ papà che se fa mbruglià facilmente, io no, io capisco, e me so’ accorta che chella figliola ve sta sempe dinta a lo core, e a me non me spusate co piacere.

ERRICO: (La guagliona tene lo naso fino!). Ma pecché, scusate, da che ve ne siete accorta?

ANNINA: Come da che me ne sono accorta? Da tutto chello che avite fatto, da tutto chello ch’è succieso fino a mò... Chella figliola D’Aversa che mannave gente a Napole pe ve trovà, e pe ve fà purtà mmasciate. Vuje dicisteve che l’aviveve lassata? Invece non era vero, anzi l’avite affittata na casa ccà a Puortece, l’avite nobilizzala, e aissera me facite j llà ncoppa pe me fà ncuntrà cu essa, e pe fà succedere chello che succedette! A papà avite potuto dicere che non ne sapiveve niente, che non sapiveve che steva llà, ma a me no, io non ve credo, non ve credo!...

ERRICO: (Vuje vedite io che guajo che aggio passato!).

ANNINA: Stasera, per esempio, de chello che sta succedenno, manco ne sapite niente? A chest’ora non se vede nisciuno ancora, lo Notaro manco è venuto. Parimme quatte mamozie dinto, io, papà, la Marchesa e buje, nce guardammo nfaccia senza dì na parola, è na bella cosa chesto?

ERRICO: E scusate, io che c’entro?

ANNINA: C’entrate, c’entrate, pecché site state vuje che non avite fatto venì lo Notaro, site state vuje che avite avvisate a tutte quante de non venì stasera.

ERRICO: Io?

ANNINA: Sì, vuje vuje, ma che ve credite che a me me fa dispiacere. Nient’affatto, anze io chesto vaco truvanno, voglio che se scombina tutte cose pecché lo carattere vuoste a me non me piace...

ERRICO: Ma sentite...

ANNINA: Ch’aggia da sentì, non nce sta che sentì, ve site fatto conoscere bastantemente.

ERRICO: E parlate sempe vuje, e non ce penzammo cchiù!