SCENA PRIMA

Concetta, Teresa, Adelina.

CONCETTA (parlando a destra): Va bene, va bene, me ne vaco, vuje comme la tirate a luongo! Comme fatico ccà fatico a n’ata parte!

TERESA (uscendo con Adelina): Ch’è stato? Ch’è succieso?

CONCETTA: L’aggio cu D. Pascale lo marito vuosto, ca m’ha fatto n’ata cancariata e m’ha ditto c’assolutamente me n’aggia j!

TERESA: Aggio pacienzia, Concè, che vuò ca te dico, chillo è nervuso! A te non te mancarrà na casa comme a chesta, e forse meglio de chesta.

CONCETTA: Ma ve pare, signora mia; io primma de tutto pe vuje faccio qualunque cosa. E pò chi se fide de stà cchiù dinta a sta casa, mamma mia! Io aggio saputo ca ogge vene pure la cammarera nova.

TERESA: Sì, è na figliola ca m’ha proposta lo sanzale.

CONCETTA: Lo saccio, lo saccio! Seh, e assaje nce dura co lo marito vuosto. Però, signò, isso m’ha da fà lo certificato de ben servito.

TERESA: Ah! Se capisce!

CONCETTA: A me non ce sta niente da dicere, me ne vaco pecché portavo quacche lettera de la signurina a lo nnammurato sujo, D. Alberto Conocchia. Ma senza scopo d’interesse.

ADELINA: Grazie, grazie Concettè! Però zi zio have voglia de fà, have voglia de dicere, che io Alberto m’aggia spusà! A rischio de qualunque cosa! Pecché ha da essere tanto cuntrario a stu matrimonio? Alberto è nu buono giovane, educato, e me vò bene. Forse pecché fa lo guantaro? E che male nce sta?

TERESA: Si tu te faje sentere, e faje chiacchiere, è peggio per te! Cu Erminia soreta non faceva lo stesso? Ammuine, allucche, pecché afforza se vulette spusà a D. Errico, doppo seje mise non ha parlato cchiù.

ADELINA: Lo saccio, ma nun lo vò vedé manco muorto, e chella povera sora mia quanno nce vene a truvà vene essa sola. E na bella cosa chesta?

TERESA: E chiano chiano, se vede accuncià pure stu fatto.

CONCETTA: Chella è giovane, cara signora, l’avita cumpatì.

ADELINA: Si tenesse a mammà e papà tutto chesto non sarrìa.

TERESA: Ma pecché, io forse nun te voglio bene comme a na figlia?

ADELINA: Io non parlo de vuje.

TERESA: E Pascale pure te vò bene. Trova quacche difficoltà quanno t’esce nu matrimmonio ma lo fa pe te mmaretà bbona, pe te fà avè na furtuna.

ADELINA Io la fortuna l’aggio truvata. Alberto me vò bene, me piace e a chillo voglio!

TERESA: E a chillo te piglie, ma haje tené cchiù maniere, e nun l’haje da piglià de faccia!