SCENA NONA

Totonno, poi Ninetta.

TOTONNO (d.d.): permesso? (Fuori.) Ccà manco nce sta nisciuno! Aggio addimannato a nu ntotero ca steva fore a la sala cu na balice: sapite si è venuta na certa Ninetta? M’ha ditto: Sissignore, sta dinto, trasite... Ma dinto addò? Mò vedimmo si sta femmena nun me fa chiagnere li juorne mieje ngalera!

NINETTA: Guè Totò, tu staje ccà?

TOTONNO: Li patrune stanno dinto?

NINETTA: No, nun nce stanno, stongo io sola cu Cuncettella.

TOTONNO Don Rafele lo sanzale m’ha ditto ch’ire venuta ccà a servì, allora io so’ venuto pe sapé si stasera avimma j a lo viglione?

NINETTA: Ah, se capisce, io lo viglione nun lo voglio perdere a la verità; mò nce lo ddico a Cuncettella ca stasera me vaco a divertì nu poco.

TOTONNO: Allora pozzo j a piglià li biglietti?

NINETTA: Se capisce!

TOTONNO: Sciasciona mia, nce vulimmo spassà, avimmo abballà tutta la nuttata!

NINETTA: Aspè Totò, faje marenna cu nuje, te magne pure tu doje ove cu nu poco de muzzarella, te haje da cuntentà.

TOTONNO: Ma te pare, vicino a tte, se fosse pane assoluto addeventa nu pranzo scicco! Ah! Mannaggia st’arta nfame ca me mparaje! (Riprendendosi.)

NINETTA: Pecché, ch’è stato?

TOTONNO: Nun pozzo fà marenna cu ttico, aggia j a fà la barba a lo cavaliere Sanguetta.

NINETTA: E allora nun mporta, stasera a lo viglione nce scuntammo tutte cose!

TOTONNO: Ninè, te raccumanno, nun me fà piglià collera!

NINETTA: Lo saccio, me l’haje ditto nu sacco di vote!

TOTONNO: Lo fatto de chillo D. Errico Battaglia che truvaste ncoppa a la Trattoria...

NINETTA: E che c’entra, chillo era n’amico de frateme... se mettette a cenà a la tavola nosta, e pe pazzià dicette quacche cosa.

TOTONNO: Lo vì chisto, lo tengo sempe pronto! (Mostra un revolver.)

NINETTA: Ma va llà vattenne, astipate stu revolvere, famme lo piacere!

TOTONNO: Dunche, allora stasera a li nove te vengo a piglià, fatte truvà pronta.

NINETTA: Nun ce penzà, statte buono, e nun fà cattive penziere!

TOTONNO: Accussì sperammo! (Via seguito da Ninetta vista di spalle da Pasquale.)