SCENA DECIMA

Pasquale, poi Ninetta.

PASQUALE: Chella ha da essere la cammarera nova! Si ascevo nu poco primma la vedevo de faccia. Ha accompagnato a n’ommo fore, mò che trase m’ha da dicere chi è, e voglio sapé Concetta che l’ha ditto de me!

NINETTA: Se n’è ghiuto finalmente!

PASQUALE: (Che veco... Gemma!...).

NINETTA: (Errico Battaglia!). Comme ve truvate ccà scusate?

PASQUALE: Comme m’e trovo ccà?... Me trovo... me trovo ccà, pecché ccà m’aggia truvà!

NINETTA: Ah, sissignore, me ricordo, vuje me lo dicisteve chella sera quanno nce lassajeme: Nun ce penzate, io non me scordo de vuje e quanno meno ve lo credite ve ncoccio! E mò m’avite ncucciata!

PASQUALE: Perfettamente, mò t’aggio ncucciata! (E comme la cumbino cu chesta?).

NINETTA: Ma caro D. Errico, io ve lo dicette ca nun era libera, che faccio ammore cu nu parrucchiere, e vuje dicisteve che perrucchiere e perrucchiere, vuje me piacite e avita essere la mugliera mia, a rischio de qualunque cosa.

PASQUALE: Ah! Chesto ve dicette?

NINETTA: Sissignore... che d’è, nun ve lo ricurdate?

PASQUALE: (Ih che pelle ca pigliaje chella sera!).

NINETTA: Io non ve pozzo dà retta, si no songo arruvinata.

PASQUALE: (Chesta se n’avarria j da ccà ncoppa! Si no io passo nu guajo!). Senti Gemma! (La putesse fà mettere paura!).

NINETTA: Ma quà Gemma! Io chella sera me cagnaje nomme, io me chiammo Ninetta.

PASQUALE: Ah, ebbene senti Ninetta, io sono venuto deciso, se tu non acconsenti all’amor mio, io esco fora a la sala e m’accide!

NINETTA: Ah, no, D. Errì pe carità, non facite chesto, io cercarraggio tutti li mezze de m’appiccecà cu Totonno e ve sposo. Ma si me vulite bene overamente non ve muvite da ccà, e non facite chello c’avite ditto.

PASQUALE: (Ma guardate che cumbinazione terribile ch’è stata chesta!).