SCENA UNDICESIMA

Concetta e detti.

CONCETTA (con mesale, bottiglia di vino, un piatto con prosciutto): Jamme, simme leste, mettimmece a tavola. (Che beco, D. Pascale!).

PASQUALE: (Statevi bene!).

NINETTA: Chesta ccà è na compagna mia, Concetta Palomma. Concettè, chist’è nu signore che conoscette 15 juorne fa ncoppa a na tratturia addò jette a cenà nzieme cu frateme, se chiamma Errico Battaglia.

CONCETTA: Ah, neh? Se chiamma Errico Battaglia! Tanto piacere!

NINETTA: Tene na grande simpatia pe me, e pe forza me vò spusà. M’ha da dà nu mese de tiempo, quanno trovo na ragione qualunque, pe me lassà cu Totonno. Chillo nientemeno ha ditto ca se vò accidere ccà, fore a la sala, dille tu quacche cosa, falle capace tu!

CONCETTA: Ma caro D. Errico Battaglia, quanno na figliola v’ha ditto: dateme nu mese de tiempo, che vulite cchiù? Pecché ve vulite accidere? E quanno pò ve site acciso, che ne cacciate? Ma no, luvateve sti penziere da la capa! Vuje mò facite marenna cu nuje ve mangiate doje ove, nu poco de presutto, ve bevite nu bicchiere de vino, e songo certa ca ve mettite talmente in allegria, ca nun penzate cchiù a sti cose. Ninè, va dinto a la cucina, lo ffuoco è pronto, e invece de quatto ove fanne sei, e porta n’ata butteglia de vino. Va, non te ne ncarricà, mò lo calm’io!

NINETTA: Grazie, grazie Concettè, mò faccio lesto lesto. (Via.)

CONCETTA: E bravo, bravo! Il signor Pasquale Cotugno va pe coppa li tratturie, se cagna nomme, e se mette a fà ammore cu na figliola! Bravissimo! E pò dinta a la casa spute sentenze, parla de moralita, fa cancariate a tutte quante! Chillo è cappellaro, chillo è guantaro, mio padre era assessore Municipale... Io so’ rucco rucco e me fa chisto certificato! Ve voglio recrià lo stommaco! Mò primma de tutto dico a Ninetta ca ve chiammate Pasquale Cotugno e che site nzurato, e pò dico tutte cose a la mugliera vosta!

PASQUALE: No, Cuncettè, pe carità! Io te faccio nu bello certificato, te cerco scusa de tutto chello ca t’aggio fatto, ma non di niente famme stu piacere. Si muglierema appura sta cosa io addò me vaco a mettere?

CONCETTA: E va bene, mò mangiammo e non dico niente. Oggi poi ci metteremo d’accordo pe li condizione!

PASQUALE: Chello ca vuò tu!

CONCETTA: Zitto, ecco ccà Ninetta!