SCENA TERZA

Ciccillo, poi Totonno.

CICCILLO: Se pò trasì? Nun ce sta nisciuno! Largo della Carità N. 83. Chest’è la casa che m’ha ditto Concettella. Ma nun me ricordo stu biglietto a chi l’aggia dà... è uno che sta ccà, dinto a sta casa cu n’amico sujo, che manco me ricordo lo nomme, mannaggia sta capa, mannaggia... Largo Carità n. 83, chesto me l’aggio ricordato, lo nomme non me lo ricordo... È nu nomme de na casa ca tenene tutte li viecchie... Ah! Tabbacchera! No, tabbacchera no... Scaldino... no... nemmeno... na cosa ca nce sta pure na strada... ncoppa, ncoppa... a la sagliuta a... mannaggia sta capa, mannaggia... a sta sempe vicino a lo ffuoco me songo arruinato la fantasia! Almeno me ricurdasse l’amico sujo, lo patrone de sta casa... statte... D. Errico... Battilocchio... no... Battipaglia... eh, Salierno!... D. Errico... Guerra!... Basta, ccà quaccheduno ha da ascì! (Siede in fondo.) Ah, D. Errico Battaglione no, nemmeno!

TOTONNO: È permesso? Bello giò, tu te ricuorde quanno poco primme so’ venuto a la casa de D. Pasquale Cotugno, che ghievo truvanno a Ninetta, e tu m’haje ditto trasite?

CICCILLO: Io?!

TOTONNO: Chella è la nnammurata mia, so’ trasuto e aggio truvato ca steva facenno marenna nzieme cu na cumpagna soja chiammata Cuncettella.

CICCILLO: Concetta Palomma, la mia futura.

TOTONNO: Futura! E che d’è futura?

CICCILLO: La mia fidanzata del futuro...

TOTONNO: La nnammurata toja?

CICCILLO: Gnorsi!

TOTONNO: Dunque, m’hanno nvitato pure a me, me songo assettato e stevo mangianno, tutto nzieme so’ ghiuto pe vedé sotto la tavola, nce steva annascunnuto n’ommo... nu carogna qualunque!

CICCILLO: E chi era st’ommo?

TOTONNO: Lo nnammurato de Ninetta!

CICCILLO: E puteva essere pure lo nnammurato de Cuncettella?

TOTONNO: No, pecché io l’aggio canosciuto, è uno che n’ata vota pure lo ncucciate cu Ninetta, nu certo Errico Battaglia.

CICCILLO: Errico Battaglia?! Puozze passà nu guajo!

TOTONNO: A chi, a me?

CICCILLO: No, a isso! Io so’ venuto a purtà nu biglietto de primura a n’amico sujo che sta accà. Chest’è la casa soja, la casa de D. Errico Battaglia!

TOTONNO: Lo saccio! Pecché quanno so’ trasuto dinto a lo salone che sta a lo vico de lo Nunzio, llà nce stà lo patrone ch’è amico mio, vedennome accussì sbigottito ha voluto sapé che m’era succiesso, quanno l’aggio contato lo fatto ha ditto: Sangue de Bacco, io a stu Errico Battaglia lo cunosco, è cappellaro, so’ seje mise che s’è nzurato. Capisce, è pure nzurato, forse chella povera Ninetta non ne saparrà niente. Allora aggio ditto: famme lo piacere, sapisse pe cumbinazione addò sta de casa? Pecché? No, niente, lle voglio cumbinà primma nu bello piattino co la mugliera, e pò parlo cu isso. Lo cumpagno mio m’ha dato l’indirizzo, accussì songo venuto. Mò comme avvarrìa fà pe fà ascì la mugliera?

CICCILLO: E che saccio? Ccà non nce sta nisciuno. Io pure avarrìa dà stu biglietto all’amico sujo. Scusate, le vecchie cu che se metteno a filà?

TOTONNO: Co lo canneve.

CICCILLO: No!

TOTONNO: Co lo lino.

CICCILLO: No!

TOTONNO: Co la stoppa.

CICCILLO: Nemmeno. Io dico le vecchie che teneno mmane?

TOTONNO: Lo fuso!

CICCILLO: Nooo!

TOTONNO: La cunocchia!

CICCILLO: La cunocchia! Puozze murì de subbeto! La cunocchia! D. Alberto la Conocchia! Vih, che c’è vuluto pe me ricordà stu nomme... Stu biglietto l’aggia dà a D. Alberto la Conocchia... Puozze sculà!

TOTONNO: Tu e isso!

CICCILLO: Aspettate, sta ascenno uno da chesta parte, addimmannammo a isso!