SCENA SETTIMA

Adelina e detti, poi Teresina.

ADELINA: Ermì, s’ha da mettere a tavula?

ERMINIA: Che tavula e tavula... Arrecettate tutte cose pecché nun se magne cchiù! Avimma ascì, avimma j a truvà a chilli duje assassine!

ADELINA: Chi assassine?

ERMINIA: Errico e D. Alberto! Chille ca nuje credevamo doje perle... Teh, legge ccà... liegge sta lettera che poco primme ha ricevuto D. Alberto. Bravo D. Alberto Conocchia!

ADELINA (riceve la lettera e dopo aver letto) Possibile!... Ma è overo chello c’aggio letto? Sta lettera è stata portata proprio a D. Alberto?

ACHILLE: Sissignore... nce l’ha purtato nu giovane poco primme. È overo, D. Alfò?

ALFONSO: Io saccio ch’è asciuto na bona strazione... Ma che Errico e l’amico sujo avessero vinto na quaterna e pe la priezza se ne so’ scappate?

ACHILLE: (Uh, mamma mia, ma chisto è surdo proprio!).

ADELINA: Nfame, traditore, birbante!

ACHILLE: Ma calmateve!

ERMINIA: Stateve zitto! Jatevenne! Lassateme stà!

ALFONSO: Ma dottò, ch’è stato?

ACHILLE: Eh, e mò capisce tu! Jammoncenne dinto a la cammera vosta e llà ve conto lo fatto!

ALFONSO: Che dicite? È stata na bona strazione?

ACHILLE: Jammo, jammo, trasite... Signò, calmatevi!... (Prende a braccetto Alfonso e viano.)

ADELINA: Ma dico io na vota ca teneva sta fata, pecché è venuto a ncuità a me?

ERMINIA: E pecché sta fata non se la tene pe isso, e la fa conoscere pure a maritemo? Adelì, damme lo cappello, mò proprio aggia ascì!

ADELINA: E addò vai?

ERMINIA: Voglio fà arrevutà lo quartiere! Pigliame lo cappiello!

TERESINA (uscendo): Ch’è stato? Neh, ch’è succiesso?

ERMINIA: Ah, zia mia! (Piange.)

ADELINA: Zia mia bella! (Piange.)

TERESINA: Ch’è stato? Parlate!....

ERMINIA: Errico me tradisce!...

TERESINA: Te tradisce? E comme?

ADELINA: Don Alberto poco primma ha ricevuto sta lettera, e subbeto se ne so’ ghiute tutte e dduje! (Dà la lettera a Teresa che legge.)

ERMINIA: Nun me dicite niente zi zi, pecché lo voglio lassà, voglio fà cose de pazze!

ADELINA: Nun aggia credere cchiù all’uommene, manco si li veco de murì! Me voglio chiudere dinto a nu cunvento!

TERESINA (che ha letto): So’ cose ca nun se credono! Ma comme, D. Errico è capace de chesto? Ma significa che ha perduto li cervelle! E sta lettera comme la tiene tu?

ERMINIA: Forse se l’ha scurdata ccà! La steve leggenno lo duttore, e appena m’ha visto se l’ha annascosta!

TERESINA: E chi sarrà sta fata? Have ragione Pascale! E vuje nun lo vulite sentere a chill’ommo!