SCENA OTTAVA

Totonno e dette.

TOTONNO: Permettete... Scusate...

TERESINA: Chi è? A chi vulite?

TOTONNO: Io songo Totonno lo parrucchiere, tengo lo salone dinto a la Curzea, avarrìa dicere doje parole a la mugliera de D. Errico Battaglia!

ERMINIA: Songh’io proprio, che m’avita dicere?

TOTONNO: Ve voglio dicere che ve tenite lo marito vuosto nu poco cchiù frenato, pe nun lo fà j ncuitanno li figliole! Si no fa passà nu guajo a quacche pover’ommo!

ERMINIA: Ma pecché, scusate? Che ne sapite ca maritemo va ncuitanno li figliole?

TOTONNO: Lo saccio, pecché è proprio la nnammurata mia ca nun vò fà sta quieta!

ERMINIA: La nnammurata vosta?

TOTONNO: 15 juorne fa li truvaje a tutte e duje pe Tuledo e me stette zitto, pecché essa me dicette ch’era amico de lo frate. Io facette a vedé che me lo credette e nun ne parlaje cchiù! Stammatina però, mentre steveme facenno marenna tutte e dduje, a core a core, aggio visto co lo marito vuosto steva annascosto sotto lo tavulino. V’assicuro, signò, ca nun l’aggio sparato pe nu miracolo!

ERMINIA: Ma io sto durmenno o sto scetata?

TERESINA: Ma fosse nu sbaglio? Stu tale se chiamma proprio Errico  Battaglia?

TOTONNO: Sissignore! Errico Battaglia! Mme so’ nfurmato, e m’hanno ditto ca s’è nzurato da seje mise e ca chesta è la casa soja!

ERMINIA: Ma che vulite sentere cchiù? E da quanto tiempo è stato stu fatto che l’avite truvato annascosto sotto lo tavulino?

TOTONNO: Cosa de n’ora fa!

ERMINIA: N’ora fa? Nfame! Birbante! E scusate, diciteme na cosa, addò stiveve facenno marenna?

TOTONNO: A la casa de nu certo D. Pascale Cotugno, addò la nnammurata mia ogge è trasuta a servì.

TERESINA: Aspettate, che state dicenno? A la casa de D. Pascale Cotugno? Ma ne site sicuro?

TOTONNO: Sissignore!

TERESINA: E comme se chiamma la nnammurata vosta?

TOTONNO: Mariannina Esposito.

TERESINA: Possibile! Allora fa ammore co la cammerera nova?

ERMINIA: E già, prufittanno ca vuje stiveve ccà!

TERESINA: E D. Errico è ghiuto dinto a chella casa senza metterse paura de li patrune?

TOTONNO: Nun nce steva nisciuno de li patrune!

TERESINA: E già, sapenno che Pascale è ghiuto a Caserta! E ll’ata cammarera nce steva?

TOTONNO: Gnorsì, nce steva, e pur’essa faceva marenna!

TERESINA: Allora Cuncettella è d’accordo cu D. Errico! Pirciò se canusceva cu Ninetta. Ah! Ma è terribile sa, è terribile! (Costernata passeggia.)

ERMINIA: Assassino, galiota!

TERESINA: E diciteme n’ata cosa, stu D. Errico Battaglia è nu giovane co li mustaccielle?

TOTONNO: Nonsignore, mustacce nun ne tene, è sbarbato!

TERESINA: Sbarbato?!

ERMINIA: Sbarbato?!

TERESINA: E allora nun è isso, è n’ato!

ERMINIA: E chi è?

TERESINA: E chi lo ssape! Currimmo subbeto a casa, senza perdere tiempo! (A Tot.) Aspettate abbascio a lo palazzo, nuje mò scennimmo!

TOTONNO: Va bene (Via pel fondo.)

TERESINA: Adelì, damme lo cappiello, fà ambressa!