SCENA PRIMA

Ninetta, poi Concetta, Errico e Alberto.

NINETTA: Ah! Ah! Io mò moro da le risa! Concettella m’ha contato tutte cose. Chist’è lo patrone de casa D. Pascale Cotugno. Ma che paura che s’ha miso, si nun piglia na malatia è nu puro miracolo!

CONCETTA: Trasite, trasite, si arivaveve n’ora primma, trovaveve nu bello spettacolo! (A Ninetta.) Che sta facenno?

NINETTA: Sta ncoppa a la pultrona, cu nu forte dulore de capa!

CONCETTA: Ninè, chisto è lo marito de la signora Erminia, e chist’ato è lo nnammurato de l’ata nepote. Chesta è la cammarera nova.

ERRICO: Ma comme, D. Pascale dicette che se chiammava Errico Battaglia?

CONCETTA: Gnorsì, cenaje cu chesta figliola na sera ncoppa a la tratturia, e le dicette ch’era scuitato e che se la vuleva spusà.

NINETTA: La cumbinazione, mentre steva ccà, è venuto lo nnammurato mio e l’aggio fatto mpezzà sotto lo tavulino...

CONCETTA: E io tanno v’avarria vuluto!

NINETTA: ...s’ha pigliato na paura che nun putite credere!...

ERRICO: Ma guardate, fa tanta chiacchiere cu nuje, predica moralità e pò va facenno chesti mbruoglie!

CONCETTA: Mò acconcio tutti li fatte vuoste, nun ve ne ncarricate, mò adda fà tutto chello ca vulimmo nuje! Trasitevenne dinto a chella cammera che ve faccio vedé belli cose!

ERRICO: Jammo Albè, jammo dinto e vedimmo che succede! (Viano.)

NINETTA: Zitto, sta venenno!

CONCETTA: Annascunnimmece, sentimmo che dice!...