SCENA SESTA

Rosina, poi Raffaele e detti.

ROSINA (esce e parla al di dentro): Assassino, assassino! ommo senza core! Ah! Mamma mia, che dolore, mò moro, mò moro... (Con una mano in fronte.)

NINETTA: Mammà...

ROSINA: Figlia mia, stai ccà. D. Felì, vuje pure? È stato lo Cielo che v’ha mannato!

NINETTA: Ma ch’è succiesso?

ROSINA: Figlie miei, abbracciateme. Figlia mia cara cara! Si sapisseve! Patete m’ha menata na scopetta nfronte. Si me la coglieva a la chiocca me rimmaneva nterra! Io mò veneva a Napole, non nce voglio sta cchiù ccà... voglio stà cu buje, dinta a la casa vosta.

FELICE: (E chesto nce manca!).

ROSINA: Ah! Che dolore! Che dolore! Ccà mò sa che molignana che se fa?

NINETTA: Ma pecché papà ha fatto chesto?

ROSINA: Pecché... pecché è nu nfamo, è n’assassino, non contento che m’aveva menata la scopetta nfronte arraggiato comme steva, ha dato nu punio nfaccia a la cristalliera e m’ha rutto tutte cose!

FELICE: E chisto è asciuto pazzo!

ROSINA: Figlia mia, figlia mia!

NINETTA: Se pò sapé ch’è stato?

ROSINA: Ch’è stato? E non te lo pozzo dicere, figlia mia! So’ cose che non te li pozzo dicere, cose tremende, cose terribili, cose che non se credene! Io non nce pozzo stà cchiù vicino a st’ommo, non nce pozzo sta cchiù! La voglio fà fenuta! (Risoluta.) Figlia mia, damme nu vaso e statte bona. (Per andare alla finestra.)

NINETTA (gridando): Ah! Felicié, la fenesta!

FELICE (la trattiene): Aspettate, mammà!

ROSINA: Non me tenite, me voglio menà abbascio, voglio murì!

NINETTA: Zitto, sta venenno papà!

RAFFAELE (coi capelli irti, la fisionomia di rabbia, terrà sul braccio camice, calzonetto, e molti abiti suoi, alla mano sinistra terrà un paio di pantofole e alla destra uno scatolo con pipe): Pe mò me sparto de lietto e vaco a dormì dinto a lo salotto, ncoppe a lo divano, dimane pò penzo io addò aggia j.

NINETTA: Papà...

RAFFAELE: Ah! Staje ccà figlia mia, e tu pure Felicié... e comme va che site venute? Vuje mancate da ccà da no mese e miezo, non sapite che sto passanne io pover’ommo co sta femmena scellerata!

ROSINA: So’ scellerata appriesso?

RAFFAELE: Pss... zitto... sa! Zitto!... Io non ne pozzo cchiù sta femmena no juorno de chisto me fa menà da coppe abbascio, me fa crepà! Ma primmo che more, te tiro la capa da dinto a la noce de lo cuollo! Te squarte viva!

ROSINA: Va llà vattenne, famme sto piacere, vuje vedite sto viecchio che s’ha chiavato ncape!...

RAFFAELE: Io so’ viecchio! Guardate chi parla, chella s’è fatta na candara de patane!

NINETTA: Papà, calmateve...

ROSINA: Non nce voglio stà cchiù nnanze a te, non nce voglio stà cchiù, me voglio spartere!

RAFFAELE: Se capisce, e quanto cchiù priesto pò essere.

NINETTA: (Pure loro?).

RAFFAELE: Dimane, dimane t’acconcio io, vecchia pazza!

NINETTA: Ma papà che è stato, se pò sapé?...

FELICE: Quanno mai ve site appiccecate de chesta manera?

NINETTA: Quale è stata la ragione?

RAFFAELE: Quale è stata la ragione? Volite sapé ch’è stato? (E che dico mò?). Cose terribili, figli miei, cose tremende, è meglio che non lo sapite, so’ cose che non se ponno dicere! Me vaco ad acconcià lo lietto dinto a lo salottino.

ROSINA: E io me vaco a  fà lo bauglio e me ne vaco!

RAFFAELE: E quanno dico! Vattenne, vattenne, non me te fà vedé cchiù!

ROSINA: E si viene addò stongo, si me viene a trovà me sconto tutto chello che m’hai fatto!

RAFFAELE: Io vengo a truvà a te? Sciù pe la faccia toja!...

ROSINA: Pe la faccia de mammeta! ... (Raffaele via a destra e Rosina via a sinistra.)

FELICE (ridendo): Ma cheste so’ cose de pazze!

NINETTA: Me pare che nun nce stesse niente da ridere.

FELICE: No, rido pe la combinazione, ma comme nuje da na parte e loro da n’auta, è stato bello!

NINETTA: Co na circostanza comme è chesta, lo dovere nuosto è chillo de mettere pace, de calmarle, de non fà succedere sta separazione.

FELICE: Ah, se capisce!

NINETTA: Doppo 34 anne che so’ state unite, chille ne pigliarriene la morte.

FELICE: Oh, chesto è certo.

NINETTA: E non avimmo fà capì niente che nce simme appiccecate che nce vulimmo spartere.

FELICE: È sottinteso. Io non parlo certo.

NINETTA: Non voglia maje lo Cielo e lo sapessere, se pigliarriano cchiù collera. Nnanze a loro avimmo da fingere, avimmo da fà vedé che stamme in perfetta armonia.

FELICE: Va bene.

NINETTA: Quanno loro hanno fatto pace, le dicimmo la verità e facimme chello che s’era ditto.

FELICE: Perfettamente.