SCENA DODICESIMA

Ninetta e Rosina, poi Luigino.

NINETTA (uscendo, parlando con Rosina che la segue di cattivo umore): Sì, so’ decisa, so’ risoluta! Ajere, cara mammà, non ve dicette niente, pecché ve trovai appiccecate co papà, ma si sapeva che chillo appicceco era na finzione, io ve dicevo tutte cose. Si me voglio spartere, non nce voglio sta cchiù nnanze a st’ommo!

ROSINA: Hai ragione, figlia mia, hai ragione, non te pozzo dà tuorto, mò ve pozzo compatì.

RAFFAELE: Rosì, mugliera mia...

ROSINA: Zitto, birbante, io nun so’ cchiù mugliera toja, t’aggio ditto che me voglio spartere.

MICHELE: Quanno t’aggio dato li prove che sta lettera non è rrobba mia, t’aggio abbuffà la faccia accussì!

CARMELA: A me?...

MICHELE: Sì, a te, a te grandissima civetta!

CARMELA: Neh, sentite, vuje site testimone, ha ditto che me vò vattere e m’ha chiammata civetta, capite, civetta...

FELICE: E tutto pe causa toja capricciosa pazza!...

NINETTA: E mò me chiamme n’auta vota pazza? Neh, avite ntiso tutte quante? Ricordatevelle, in pubblico m’ha chiamma pazza!...

RAFFAELE (a Rosina che si è messa a scrivere al tavolino): A chi staje scrivenne?

ROSINA: Sto scrivenne a frateme che sta a Barletta, me ne vaco addò isso, non nce voglio stà cchiù dinto a sta casa.

RAFFAELE: Io t’assicuro, Rosì...

ROSINA (gridando): Non nce voglio stà cchiù!

RAFFAELE: E vattenne, non me rompere cchiù la capa!

ROSINA: Neh! Avite ntiso, me n’ha cacciata! Ricordatevelle tutte quante. (Tutti passeggiano arrabbiati.)

LUIGINO (dal fondo a sinistra): Eh, mò non me la facite cchiù! Stanne pazzianne tutte quante, lo fanno apposta. Neh, sapete, io aggio fatto capace a D. Peppino. Stamme aspettanno mmiezo a la strada, li pozzo fà saglì?

FELICE: Che hai da fà saglì, ccà sta l’inferno apierto!

LUIGINO: Ma fanno apposta?

FELICE: No, fanno overo!

LUIGINO: Uh, e comme faccio? Io l’aggio ditto che l’appicceco era na pazzia, e chillo mò addirittura me piglie a cauce! Signori miei, calmateve no poco, io aggio da fà trasì la sposa mia co lo patre, la quale va trovanno pace, tranquillità nella famiglia, vuje me facite no guajo! Papà, mammà, pe carità, stateve zitto, si no me facite scombinà lo matrimonio, chella tene 50 mila ducate de dote. No momento, pe na mez’ora, e po’ accumminciate n’auta vota!

RAFFAELE: Signori, vi prego, un poco di calma! Avete inteso di che si tratta? (Pausa seggono silenziosi.) Và li piglie, fà ambressa...

LUIGINO: Grazie tanto. Fisonomia, ridenti... Ah, si ve putisseve fà trovà abbracciati... sarria na bella cosa!

RAFFAELE: Chesto non pò essere... mò vuò troppo mò! Và li piglie, non perdere tiempo.

LUIGINO: Eccomi qua. (Via pel fondo a sinistra. Pausa.)

CARMELA (sottovoce): Civetta ovè, e so’ civetta io? Lo può dicere?

MICHELE (sottovoce): Se capisce, pecché non se parla de chella manera nfaccia a no marito comme a me!

RAFFAELE (guardando in fondo a sinistra): Pss, embè, io v’aggio pregato. (Pausa.)

NINETTA: Te voglio fà vedé sta capricciosa, sta pazza, che sape fà!

FELICE: Nun nce appure niente, pecché tengo la prova della mia innocenza.

RAFFAELE: Pss... Stateve zitto!...

ROSINA: Che bella cosa, che ommo, a chell’età! (Sottovoce.)

RAFFAELE: E te può lagnà de me? (Gridando.)

TUTTI: Pss... Zitto!...

RAFFAELE (sottovoce): Te può lagnà de me...