SCENA OTTAVA

Bettina, e detti.

BETTINA: Uh, signurì, vuje state ccà?

LUIGI: Sì, e Carmela che t’ha ditto?

BETTINA: Ha ditto che le dispiace assai che partite, ma vò che tornate priesto, e stasera ve volarria vedé no momento.

LUIGI: E io pure le vollarria vasà no poco la manella, ma comme se fa?

BETTINA: Vuje a che ora partite?

LUIGI: A li diece e quaranta.

BETTINA: Embè, sentite, quanno s’è fatto notte, facite lo solito fisco, e si lo patrone s’è cuccato, io da la fenesta ve faccio no signale e vuje saglite pe la scala de servizio, la salutate e ve ne jate.

LUIGI: Ah! Brava, brava chella Bettina mia!... Io po’ te faccio no bello regalo.

FELICE: Chi è neh?

BETTINA: Io sono la cameriera del nuovo inquilino.

FELICE: Bravo! (A Luigi.) Ma sei proprio no micco sà!

AGAPITO: Sentite D. Felì, a lo pentone de lo vico s’è aperta una birreria, dice che tene no bicchiere de vino de Chiante che è na bellezza, mò che scennimmo lo ghiammo ad assaggià, vedimmo ched’è.

FELICE: Lo ssoleto, quanno sentite vino buono, correte sempre.

AGAPITO: Che volete, è la mia passione.

FELICE: Va bene... jammoncenne. Luì, jamme! (Marcato.)

LUIGI: Sono con voi. (Non te scurdà li ciente lire e li lettere).

FELICE: (Ma chella mò che fà dinto a lo stipo?).

LUIGI: (E che te ne preme a te!).

FELICE: (A me, manco pe la capa!...).

AGAPITO: Addò jate D. Felì, non è chesta la porta.

FELICE: Ah, già...

AGAPITO: Sempre distratto... che brutto vizio.

FELICE: No, ma non è stàto per distrazione, voleva scendere per la scala di servizio... si fa più presto.

AGAPITO: Si fà più presto? Allora scendiamo per la scala di servizio, io non ci attacco idea.

LUIGI: E io nemmeno.

FELICE: Prego...

AGAPITO: Grazie. (Viano a sinistra.)

BETTINA: Che bello piacere de trovà a D. Luigi ccà ncoppe. La signorina m’ha prommiso no regalo, isso pure, mò vedimmo che me danno.