SCENA PRIMA

Beatrice e Ciccillo poi Carmela.

BEATRICE (dal lato destro a Ciccillo che spazza la scena): Ciccì, scopa buono, e po’ adacqua tutte li piante.

CICCILLO: Non dubitate, mò che vene D. Felice lo sposo vuosto, lo voglio fà rimmanè ncantato.

BEATRICE: Bravo! E dì a Concettella che spicciasse la colezione e non facesse mancà niente, pecché non vulimmo fà cattive figure.

CICCILLO: Va bene. (Spazza.)

BEATRICE: Me parene mill’anne che sposo, accussì me levo de tuorno chella pazza de sorema, — da che è muorto lo marito non nce se po’ cchiù parlà, sta sempre arraggiata — papà se credeva che portannola ccà, a sta bell’aria, se fosse calmata, ma che, da tre ghiuorne che simme venute, sta cchiù nervosa de primma, è stato peggio! (Coglie dei fiori.)

CARMELA (dal lato sinistro): Io non saccio proprio a che penzà, stongo comme all’asene mmiezo a li suone. Chillo tale che papà pigliaje pe Luigi Belfiore; otto juorne fà a Napole me dicette: signorina, non ve n’incaricate, acconsentite, secondate a tutto, e Luigi sarà vostro marito, ma pecché sta finzione, io non capisco.