SCENA PRIMA

Pasquale e Michele, poi Luigi e Raffaele.

MICHELE (portando una poltrona): Jamme, Pascà, fà ambresse, che so’ l’otte.

PASQUALE (con altra poltrona): Aspè, Michè, ccà sta a lo scuro, che nce volimmo rompere pure na gamma.

MICHELE: E ched’è, hai da stà a lo lustro pe sapé addò haje da j?

PASQUALE: Io non saccio niente, saccio solamente che me more de famme, e sta vita non la voglio fà cchiù.

MICHELE: Statte zitto che dimane magnammo.

PASQUALE: Tu quà dimane, io aggio da magnà stasera. Michè, chiacchiere non ne sente cchiù. (Via con Michele a sinistra.)

LUIGI (uscendo con Raffaele dalla destra): Ma famme capì Rafè, stasera veramente recita Gemma, la nepote de D. Peppino?

RAFFAELE: Sissignore, ma che ve credite mò, recità? È na piccola scena che le ha scritto D. Felice, lo suggeritore.

LUIGI: Già, lo manifesto dice: Un monocolio, e intanto è bastato chist’annunzio pe fà jenchere lo teatro stasera... Non nce sto no posto, manco si lo vuò pagà cinche lire! Io voleva no palco pe na famiglia che me l’aveva cercato co tanta premura. Embè, co tutto che songo lo segretario de lo sinneco, non l’aggio potuto avé.

RAFFAELE: E se capisce, quanno non nce ne stanne!... Ccà, avite da sapé che tutta la compagnia se moreva de famma. D. Peppino, lo mpressario, la settimana passata, partette e li rummanette senza no soldo.

LUIGI: E addò jette?

RAFFAELE: Jette a vedé si trovava quacche auta piazza. Ogge s’aspettava, e manco è venuto. Chesti povera gente stanne chine de diebete. Lo trattore non lo vò fà cchiù credenza; e si non fosse stato pe lo sinneco, che tanto buono li tene alloggiate dinto a li cammere che stanno ncoppa a lo teatro comme avarriene fatto?

LUIGI: Ma, caro Rafele, agge pacienzia, chesta che compagnia è? Quanno mai a sto teatro nce so’ state questi artisti così scadenti? Tu mò fai lo custode da tanto tiempo ccà dinto, è venuta mai na compagnia accussì?

RAFFAELE: Ma scusate, la colpa de chi è? De la Commissione!

LUIGI: De la Commissione? Io mò che t’aggia dicere? Fuje lo sinneco che se nnammuraje de la sora de lo suggeritore, e non pensai e a niente cchiù.

RAFFAELE: A la verità, io avarria fatto lo stesso, pecché chella è proprio na sciasciona!

LUIGI: Sì, ma non se vò fà manco tuccà co no dito, e lo sinneco sta accommincianno a perdere la pacienzia. Chella è no mese che lo sta portanno pe li viche, se lo stà facenno, comme se dice, co passe e pignuole.

RAFFAELE: E isso non se n’addone.

LUIGI: Isso ha accomminciato a capì che chella lo coffea, e stà arraggiato de na mala manera.

RAFFAELE: E se capisce!

LUIGI: Neh? Rafè, ma l’elettricista è venuto? Mò è tarde! Ccà sta ancora tutte cose a lo scuro.

RAFFAELE: E chesto saccio!... A chest’ora avarria avuto da venì.